ЧӨЛӨӨТ БӨХ: С.Батцэцэг хагас шигшээд ялагдлаа

Токиогийн олимпын наадмын чөлөөт бөхийн тэмцээний хоёр дахь өдөр буюу өнөөдөр эмэгтэй 68 кг-ын жингийнхэн барилдлаа.

Энэ жинд барилдаж байгаа Гавьяат тамирчин С.Батцэцэг 1/8 шигшээд ДАШТ-ий мөнгө, хүрэл медальт Францын Кумба Ларроктой учраа таарсан. Гурван оноо дутуу байхдаа барилдаан дуусахаас 19 секундын өмнө мордож 4 оноо аван, үргэлжлүүлэн цэвэр дарж ялсан.

Дараа нь 1/4 шигшээд 2019 оны ЕАШТ-ий алт, мөнгөн медальт ОХУ-ын Ханум Вилиеваг 8:5-аар ялсан.

Ингээд хагас шигшээд Блессинг Оборудудутай (Нигери) барилдах боллоо. Блессинг бол Африк тивд сүүлийн 10 жил босоо байгаа бөх. Африкийн 10 удаагийн аварга. Исламын шашинт орнуудын наадмын 2017 оны аварга.

Блессинг эхлээд Азербайжаны Маноловаг 13:2 ялж, дараа нь Киргизийн Мээрим Жуманазароваг 3:2 ялж, хагас шигшээд шалгарсан.

Эхний үед Нигерийн бөх хамж ороод ард гарч 2 оноо, түрж хөөж, дэвжээнээс гаргаад 1, дахин ард гарч оноо авсаар эхний үеийг 7 онооны зөрүүтэй дуусгалаа. Хоёрдугаар үе дуусах дөхөж байх үед 2 оноо авсан ч оройтсон байлаа. 

Энэ жингийн дагах барилдаан маргааш 11:00 цагаас, финалын барилдаан 19.30 цагаас эхлэх юм. 

Тамира Менса (АНУ), Блессинг Оборудуду (Нигер) нар яллаа.