С.Батцэцэг Азербайжан, Киргизийн бөхийн хэн ялсантай барилдана

2021 оны 08 сарын 03

Токиогийн олимпын наадмын чөлөөт бөхийн тэмцээний гурав дахь өдөр буюу өнөөдөр эмэгтэй 68 кг-ын жингийн медалийн төлөө барилдаантай.

Энэ жинд барилдаж байгаа Гавьяат тамирчин С.Батцэцэг 1/8 шигшээд ДАШТ-ий мөнгө, хүрэл медальт Францын Кумба Ларроктой учраа таарсан. Гурван оноо дутуу байхдаа барилдаан дуусахаас 19 секундын өмнө мордож 4 оноо аван, үргэлжлүүлэн цэвэр дарж ялсан.

Дараа нь 1/4 шигшээд 2019 оны ЕАШТ-ий алт, мөнгөн медальт ОХУ-ын Ханум Вилиеваг 8:5-аар ялсан.

Хагас шигшээд Блессинг Оборудудутай (Нигери) барилдаж, 2:7 ялагдсан.

Ингээд манай бөх хүрэл медалийн төлөө Блессинг Оборудудуд ялагдсан хоёр бөхийн хэн ялсантай нь барилдах боллоо. Блессинг эхлээд Азербайжаны Маноловаг 13:2 ялж, дараа нь Киргизийн Мээрим Жуманазароваг 3:2 ялж, хагас шигшээд шалгарсан.

Энэ жингийн дагах барилдаан 11:00 цагаас эхэлж, Азербайжаны Манолова, Киргизийн Мээрим Жуманазарова нар барилдана. Хэн ялсантай нь манай бөх орой 18.15 цагт хүрэл медалийн төлөө барилдах болно.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top