Садулаев, Снайдерын ТУЛААН сагсан бөмбөгийн ФИНАЛЫГ давлаа

Зуны олимпын наадмын хамгийн гол тоглолтын нэг нь сагсан бөмбөгийн финал байдаг. Харин энэ удаад Токиод сагсан бөмбөгийн финалыг эрт 11:30 цагаас явуулж, үдэш нь хүрэл медалийн тоглолтыг зохион байгуулахаар болов.

Тиймээс өнөөдөр Токиогийн олимпын наадмын гол тоглолт, тулаан нь чөлөөт бөхийн 97 кг-ийн финалын барилдаан болоод байна.

Энэ бол ОХУ-ын Садулаев, АНУ-ын Кайл Снайдер нарын олимпын аваргуудын тулаан.

Токиод ирсэн Риогийн олимпын бөхийн аваргууд Михейн Лопесоос бусад нь ялагдаад байгаа. Харин 97 кг-д Риогийн олимпын хоёр аварга шалгараад байгаа тул хэн нэг нь олимпын хошой аварга болох нь ойлгомжтой.

Садулаевын хэсэг хэцүү таарсан ч тэр бүх өрсөлдөгчөө нийт 19:0 оноогоор ялаад гарч ирсэн.  
 

"Садулаев ба Снайдер" гэсэн агуу тулаан гурав дахь удаагаа болох гэж байна.

2017 онд Парист Снайдер ялсан бол 2018 онд Будапештэд Садулаев цэвэр дарж, хариугаа авсан.