Хамес Родригес Катарын Аль-Райянд очлоо

Колумбийн хөлбөмбөгч Хамес Родригесийн Европ дахь замнал төгсгөл боллоо. 2014 оны ДАШТ-д од болон гялалзсан түүнийг Испанийн Реал Мадрид баг 80 сая еврогоор авснаар замнал нь уруудах замдаа орсон гэхэд болно. Реалд тааруухан байсан тэрээр Германы Баварид зээлээр очоод ч тусыг эс олов. Эцэст нь тэр Английн Эвертонтой 2 жилийн гэрээ байгуулсан.

Карло Анчелоттигийн урилгаар Эвертонд очсон тэр өнгөрсөн улирлын эхний таван тойрогт 3 гоол, 3 оновчтой дамжуулалт өгч, урамтай сайхан тоглож байлаа. Гэвч гэмтэл бүх хүчин зүтгэлийг нь үгүй хийж орхисон юм. 2020 оны 12 дугаар сараас 2021 оны гуравдугаар сар хүртэл эмчлүүлсэн Хамес улирлын эцсээр талбайд эргэн ирсэн ч ямар ч формгүй болсон байлаа. Европт амжилтгүй байгаа ч эх орондоо бол од хэвээр хэмээн бодож байсан түүнд бас нэгэн цохилт учирсан нь Колумбийн шигшээ баг түүнийг Америкийн Цом тэмцээнд уриагүй явдал байлаа. Шигшээ багтаа ч гологдсон тэр Эвертон багтаа хүчин зүтгэхээр бэлтгэж байсан ч Карло Анчелотти Испанийн Реалд уригдаж, оронд нь эртний “дайсан” Рафаэль Бенитес Эвертоныг удирдахаар хүрээд ирэв. Энэ хоёр Реалд байхдаа л муудалцсан хүмүүс. Эвертонд хамтран ажиллаж чадахгүй нь тодорхой. Ингээд Родригес өөр баг хайж эхэлсэн ч Европын шилдгүүд түүнийг авахыг хүссэнгүй. Харьж яваа ч цалин өндөртэй тэр хаана ч хэрэггүй болсон байв.

Хамесийн цалин, хувийн шаардлагыг хүлээж авсан ганц баг байсан нь Катарын Аль-Райян. Салж л байвал хэнд ч хамаагүй зарах хүсэлтэй байсан Эвертон дуртай нь аргагүй зөвшөөрлөө. Ийнхүү Хамес 30 настайдаа их хөлбөмбөгөөс албан ёсоор холдлоо гэхэд болно.

Аль-Райян бол Катарын шилдэг багуудын нэг. Найман удаа улсынхаа аварга болсон. Өнгөрсөн жилийн хүрэл медальт. Дасгалжуулагч нь Францын Лоран Блан. Энэ багт цагтаа Испанийн Фернандо Йерро, голландын ах дүү де Бурууд тоглож байв. Одоогийн бүрэлдэхүүнээс хамгийн алдартай нь Портуд 5 жил тоглосон Алжирийн Ясин Браими. Багийн ерөнхийлөгч Абдулла бин Хамад Аль Тани 33 настай. 2,5 тэрбум долларын хөрөнгөтэй.