Хамгийн ахмад сүмоч 51 настайдаа 50 хувийн амжилт үзүүллээ

Мэргэжлийн сүмогийн хамгийн ахмад бөх, Тацүнами дэвжээний Ханаказэ өнөөдөр Такасаго дэвжээний  Асашёорэйг ялж, 4 даваа, 3 унаатайгаар 50 хувийн амжилт үзүүллээ. Ханаказэ 51 настай бол өрсөлдөгч нь 16 настай, тэдний насны зөрүү 35 байлаа.

Ханаказэ бол Шёова, Хэйсэй, Рэйва эринд барилдсан анхны бөгөөд цорын ганц сүмоч.

Тэрээр 1986 он буюу Шёовагийн 61 онд мэргэжлийн сүмод элссэн. Хэйсэй эринд 2008 оны Намрын тэмцээнээс бусад бүх тэмцээнд оролцож, ийнхүү Рэйва эринтэй золгожээ. Тацүнами оякатагаасаа нэг жилийн өмнө мэргэжлийн сүмод орсон бөгөөд 2011 оны Нагоя башёгоос хойш хамгийн ахмад сүмочийн хэргэмийг зүүж байна.

Санданмэгийн зүүний 18-д эрэмблэгдэж байсан нь түүний хамгийн том амжилт юм.