ОСЛО 2021: Өнөөдөр манай 4 бөх барилдана

Норвегийн Ослод болж байгаа бөхийн төрлийн ДАШТ-ий гурав дахь өдөр буюу өнөөдөр эрэгтэй 70 кг-д Б.Батмагнай, 97 кг-д Ө.Батзул, эмэгтэй 55 кг-д Э.Сумьяа, 62 кг-д Э.Гантуяа нар барилдана.

Б.Батмагнай 1/8 финалд Иван Кусяк (Украин), Даниел, Антал (Унгар) хоёрын ялсантай барилдана. Эхний барилдаандаа давахад Буриадын Евгений Жербаевтай таарах магадлал өндөр. Евгений эхлээд Казахстаны Талгаттай таарсан байгаа.

Энэ хэсэгт Ираны Элахи байгаа бол нөгөө талд ДАШТ-ий медальт, Европын аварга Магомедмурад Гажиев (Польш), дэлхийн аварга Зураби Якобишвили (Гүрж), Туркийн Кайя, Адам Батиров (Бахрейн), Америкийн Грин нар оржээ.
 

Ө.Батзул тэгшитгэлд 2020 оны Панамерикийн АШТ-ий хүрэл медальт Канадын Nishan Preet Singh RANDHAWA-тай таарсан. Түүнийг ялахад олимпын алт, мөнгөн медальт, дэлхийн хошой аварга, АНУ-ын Кайл Снайдертай барилдана.

Эмэгтэй 55 кг-д 14 бөх барилдана. Э.Сумьяа эхний тойрогт 2019 оны ДАШТ-ий хүрэл медальт, Европын сүүлийн хоёр жилийн аварга, ОХУ-ын Ольга Хорошавцеватай барилдана.

62 кг-д Э.Гантуяа АНУ-ын Кайла Мираклетэй учраа таарлаа. Кайла энэ жилийн Панамерикийн аварга бүсгүй.