Өнөөдрийн ХАГАС ШИГШЭЭД шалгарсан бөхчүүд

Норвегийн Ослод болж байгаа чөлөөт бөхийн ДАШТ-д өнөөдөр эмэгтэй 57, 59, 68, 72 кг-ын жингийн барилдаан болж, хагас шигшээд барилдах бөхчүүдийн нэрс тодорлоо.

57 кг-д Эрхэмбаярын Даваачимэг Туркийн Эльвира Камалоглутай барилдаж, 11:0 оноогоор цэвэр яллаа. Дараагийн тойрогт энэ жилийн Азийн аварга, 2020 оны Азийн АШТ-ий хүрэл медальт, Дэлхийн Цомын мөнгөн медальт, Энэтхэгийн Аншу Маликтай таарч, 1:5 ялагдсан.

59 кг–д Баатаржавын Шоовдор 2020 оны Дэлхийн Цомын аварга, Европын АШТ-ий мөнгө, хүрэл медальт, Европын наадмын мөнгөн медальт ОХУ-ын Светлана Липатоваг 2:1 ялсан. Дараа нь 2019 оны дэлхийн залуучуудын аварга, 2018 оны U23 дэлхийн аваргын мөнгөн медальт, 2017 оны Дэлхийн Цомын аварга Японы Ханаи Акиэтай барилдаж, 0:6 ялагдлаа.

68 кг-д Энхсайханы Дэлгэрмаа Токиогийн олимпын мөнгөн медальт, Африкийн 10 удаагийн аварга, Африкийн наадмын хошой аварга, Исламын шашинт орнуудын наадмын аварга, Нигерийн Блессинг Оборудудутай таарч, 0:10 оноогоор цэвэр ялагдсан. Блессинг Оборудуду ОХУ-ын Ханум Велиевад 7:8 ялагдсанаар манай бөх дагах барилдаангүй хоцорлоо.

72 кг-д Энх-Амарын Даваанасан 2019 оны Нурсултаны ДАШТ-ий хүрэл медальт, Азийн аваргын мөнгө, хүрэл медальт, 2019 оны U23 дэлхийн аварга, Японы Фүрүичи Масакотой эхний барилдаанаа хийж, 0:6 хожигдсон.

Э.Даваачимэг, Б.Шоовдор, Э.Даваанасан нарыг ялсан бөхчүүд хагас шигшээд шалгарсан тул тэд давсан тохиолдолд дагах барилдааны эрх авах боломжтой.

Хагас шигшээд шалгарсан бөхчүүд

57 кг.

Хелен Марулис (АНУ) - Саэ Наньо (Япон)

Соломия Винник (Украин) - Аншу Малик (Энэтхэг)

59 кг.

Акие Ханаи (Япон) - Майя Нельсон (АНУ)

Биляна Дудова (Болгар) - Сарита Сарита (Энэтхэг)

68 кг.

Ханум Велиева (ОХУ) - Мээрим Жуманазарова (Кыргызстан)

Тамира Менса (АНУ) - Рин Мияжи (Япон)

72 кг.

 Жамиля Бакбергенова (Казахстан) - Бусе Тосун (Турк)

Масако Фүрүичи (Япон) - Анна Шелл (Герман)