Э.Даваачимэг, Б.Шоовдор, Э.Даваанасан нар хүрэл медалийн төлөө барилдана

Норвегийн Ослод болж байгаа чөлөөт бөхийн ДАШТ-д өнөөдөр эмэгтэй 57, 59, 68, 72 кг-ын жингийн дагах барилдаанууд барилдаан болж байна.

57 кг-д Эрхэмбаярын Даваачимэг Туркийн Эльвира Камалоглутай барилдаж, 11:0 оноогоор цэвэр ялсан. Дараагийн тойрогт энэ жилийн Азийн аварга, 2020 оны Азийн АШТ-ий хүрэл медальт, Дэлхийн Цомын мөнгөн медальт, Энэтхэгийн Аншу Маликтай таарч, 1:5 ялагдсан. Харин Аншу Малик хагас шигшээд Украины Соломия Винникийг 11:0 ялснаар манай бөх дагах барилдаан хийх боллоо. Өрсөлдөгч нь Казахстаны Нилуфар Раимова.  Э.Даваачимэг 10:0 цэвэр яллаа. Өнөө шөнө Украиын Соломия Винниктэй хүрэл медалийн төлөө барилдана.

59 кг–д Баатаржавын Шоовдор эхний тойрогт ОХУ-ын Светлана Липатоваг 2:1 ялсан. Дараа нь 2019 оны дэлхийн залуучуудын аварга, 2018 оны U23 дэлхийн аваргын мөнгөн медальт, 2017 оны Дэлхийн Цомын аварга Японы Ханаи Акиэтай барилдаж, 0:6 ялагдлаа. Ханаи хагас шигшээд АНУ-ын Майя Нельсоныг ялсан тул Б.Шоовдор дагах барилдаан хийх боллоо. Тэрээр эхлээд Казахстаны Диана Каюмоватай барилдаж, 6:0 яллаа. Өнөөдөр хүрэл медалийн төлөө АНУ-ын Майя Нельсонтой барилдана.

72 кг-д Энх-Амарын Даваанасан 2019 оны Нурсултаны ДАШТ-ий хүрэл медальт, Азийн аваргын мөнгө, хүрэл медальт, 2019 оны U23 дэлхийн аварга, Японы Фүрүичи Масакотой эхний барилдаанаа хийж, 0:6 хожигдсон. Фүрүичи хагас шигшээд Германы Шеллийг ялсан тул манай бөх дагах эрхтэй болсон. Э.Даваанасан эхлээд Энэтхэгийн Дивья Каркантай барилдаж, 6:2 яллаа. Өнөөдөр хүрлийн төлөө Германы Анна Шеллтэй өрсөлдөх юм.