ОСЛО-2021: Монгол бөхчүүдийн барилдааны бичлэг

Норвегийн Ослод болж байгаа чөлөөт бөхийн ДАШТ-ий тав дахь өдрийн медальтнууд өчигдөр (2021.10.07) тодорлоо.

Манай гурван бөх хүрэл медалийн төлөө өрсөлдсөнөөс Э.Даваачимэг, Б.Шоовдор нар ДАШТ-ий хүрэл медаль хүртлээ.

57 кг-д Эрхэмбаярын Даваачимэг Туркийн Эльвира Камалоглутай барилдаж, 11:0 оноогоор цэвэр ялсан.

Дараагийн тойрогт энэ жилийн Азийн аварга, 2020 оны Азийн АШТ-ий хүрэл медальт, Дэлхийн Цомын мөнгөн медальт, Энэтхэгийн Аншу Маликтай таарч, 1:5 ялагдсан.

Дагах барилдаанд манай бөх Казахстаны Нилуфар Раимоваг 10:0 цэвэр яллаа.

Хүрэл медалийн төлөө Украины Соломия Винниктэй барилдаж, 11:8 ялан, дэлхийн аваргын медаль зүүлээ.

59 кг–д Баатаржавын Шоовдор эхний тойрогт ОХУ-ын Светлана Липатоваг 2:1 ялсан.

Дараа нь 2019 оны дэлхийн залуучуудын аварга, 2018 оны U23 дэлхийн аваргын мөнгөн медальт, 2017 оны Дэлхийн Цомын аварга Японы Ханаи Акиэтай барилдаж, 0:6 ялагдлаа.

Дагах барилдаанд Казахстаны Диана Каюмоватай барилдаж, 6:0 яллаа.

Хүрэл медалийн төлөө АНУ-ын Майя Нельсонтой барилдаж, 4:3 ялалт байгуулж, дэлхийгээс 3 дахь медалиа зүүлээ.

72 кг-д Энх-Амарын Даваанасан 2019 оны Нурсултаны ДАШТ-ий хүрэл медальт, Азийн аваргын мөнгө, хүрэл медальт, 2019 оны U23 дэлхийн аварга, Японы Фүрүичи Масакотой эхний барилдаанаа хийж, 0:6 хожигдсон.

Э.Даваанасан дагах барилдаанд Энэтхэгийн Дивья Каркантай барилдаж, 6:2 яллаа.

Хүрлийн төлөө Германы Анна Шеллтэй өрсөлдөж, цэвэр ялагдлаа.