П.Гансүх: Дэлхийн медаль хүртсэн тамирчдынхаа ГАВЬЯАГ үнэлүүлнэ

Норвегийн Ослод болсон чөлөөт бөхийн ДАШТ-д амжилттай оролцсон Монголын шигшээ баг өнөөдөр эх орондоо ирлээ.

Манай эмэгтэйчүүдийн баг 4 хүрэл медаль, 2 шагналт байр эзэлсэн амжилтаар тэмцээнд оролцсон 34 орноос 3-т шалгарч, Хүрэл Цомын эзэн болсон. Харин эрэгтэй баг 2 хүрэл медаль, 3 шагналт байр эзэлсэн амжилтаар 52 орноос 6-р байрт жагссан. Эрэгтэй, эмэгтэй багийн дүнгээр эхний 6-д багтсан хоёрхон орон байсан нь АНУ, Монголын баг байлаа.

Өнөөдөр өглөө эх орондоо ирсэн шигшээ баг 11.30 цагт Туушин зочид буудалд хэвлэлийн бага хурал хийлгэсэн юм.

Хэвлэлийн бага хурлын үеэр Монголын чөлөөт бөхийн холбооны Ерөнхийлөгч П.Гансүх “Дэлхийн дэвжээнд амжилттай өрсөлдсөн шигшээ багийн хамт олон, тамирчдын клуб, үндсэн болон анхны багш нар, тамирчдаа дэмжсэн хүн болгонд баяр хүргэе. Ослогийн дэлхийн аваргад манайхан долоон өдөр барилдсан. Энэ долоо хоног монголчуудад маш сайхан эерэг уур амьсгал авчирсан. Энэ удаагийн ДАШТ-д тун залуу бүрэлдэхүүнтэй оролцож, зургаан хүрэл медальтай ирлээ. Үүнээс тав нь олимпын жинд авсан медаль байлаа. Энэ нь 2024 оны Парисын олимпод оролцох манай баг хамт олон, багш дасгалжуулагч нарт тамирчдаа сайн бэлтгэж оролцуулах хүндтэй үүрэг хариуцлага оногдлоо гэж хэлэхэд болно. Манай чөлөөт бөхийн шигшээ багт гавьяа байгуулаад үнэлүүлж чадаагүй тамирчин маш олон байгаа. Энэ ДАШТ-д олимпын жинд медаль авсан тамирчиддаа Монгол Улсын Гавьяат тамирчин цол олгуулах талаар Монголын чөлөөт бөхийн холбоо ажиллана гэдгээ нийт багш тамирчдын өмнө амлаж байна. Өмнө нь ДАШТ-ий медаль авсан, амжилт гаргасан олон тамирчин бий. Б.Одончимэг, Б.Оюунсүрэн, Э.Сумъяа, Т.Түвшинтулга нар маань амжилтаа үнэлүүлээгүй байгаа. Б.Шоовдорын хувьд дэлхийгээс гурав дахь хүрэл медалиа авсан. Энэ тамирчдынхаа шагналын тодорхойлолтыг бэлэн болгосон байгаа. Парисын олимпын циклийн эхний ДАШТ-д залуучууд маань сайхан амжилттай оролцсонд баярлаж байна. Та бүхэнд баяр хүргэе” гэж ярилаа.