Боксын ДАШТ: Х.Энх-Амар хожигдож, Б.Чинзориг яллаа

Сонирхогчдын боксын эрэгтэйчүүдийн дэлхийн аваргын тэмцээн өчигдөр (2021.10.25) Сербид эхэллээ.

Эхний өдөр 57, 67 кг-ын тамирчид өрсөлдөв. 

Манай тамирчдаас хамгийн түрүүнд 57 кг-ын жингийн Х.Энх-Амар Казахстаны Серик Темиржановтай тулалдлаа.

Шүүгчид санал нэгтэй казах залууд ялалт өгснөөр манай тамирчин 0:5 ялагдсан байна.
 

Тулааны дараа Серик Темиржанов “Төгс тулалдаж чадаагүй ч сайхан яллаа. Монгол өрсөлдөгч маань маш хүчтэй, туршлагатай тамирчин байсан. ДАШТ эхлэхээс өмнө бид түүний тулааныг нарийн задлан судлаж, дүн шинжилгээ хийсэн. Би дасгалжуулагч нарынхаа зааврыг яг дагаж ажиллалаа, тактик ч маш зөв байлаа. Урьд өмнө том тэмцээнд оролцоод амжилт гаргаж чадаагүй тул энэ удаад би өөрийгөө батлан харуулахын тулд хичээх болно” гэж ярьлаа.
 

Харин 67 кг-ын жинд Б.Чинзориг Гватемалын Карлос Тобартай  тулалдаж, 4:1 яллаа.

Тэрээр дараагийн тойрогт Лондоны олимпын хүрэл медальт, 2011 оны ДАШТ-ий хүрэл медальт, Италийн Винченцо Манджакапретэй тулалдана.
 

Винченцо одоо хагас мэргэжлийн World Series Boxing лигийн Dolce & Gabbana Italia Thunder багийг төлөөлж байна.