Чөлөөт бөх: Иран-АНУ халз тулааны тасалбар худалдаанд гарлаа

АНУ, Ираны чөлөөт бөхийн шигшээ багийн халз тулаан ирэх оны хоёрдугаар сарын 12-нд Америкийн Техас мужийн Арлингтон хотод болно. 

Тус барилдааны тасалбар худалдаанд гарчээ. 27 мянган тасалбар бүгд зарагдаж дуусна гэдэгт зохион байгуулагчид итгэлтэй байна.
 

1979 оны Исламын хувьсгалын дараа хоёр орны хооронд дипломат харилцаа зогссон. Харин бөхчүүд 1998 оноос хойш харилцан зочилж, халз барилдаан зохион байгуулж байгаа. Тэр цагаас хойш америкчууд 17 удаа иранд, Ираны бөхчүүд 16 удаа АНУ-д зочилж байжээ.

Саяхан Ослод өндөрлөсөн чөлөөт бөхийн ДАШТ-д багийн дүнгээр АНУ 2-т, Иран 3-т шалгарсан. Аль аль нь гурван алтан медальтай тэмцээнээ өндөрлүүлсэн билээ.
 

Ирэх жил болох нөхөрсөг тэмцээн бейсболын Globe Life Field цэнгэлдэхэд болно.

Тус тэмцээнд бүх шилдгүүдээ зодоглуулна гэдгээ Ираны багийн ахлах дасгалжуулагч Пежман Доросткар мэдэгдээд байна.