МҮОХ-ны Генсек Э.Бадар-Ууган Синьхуа агентлагт ярилцлага өгөв

2021 оны 12 сарын 02

БНХАУ-ын төрийн мэдлийн Синьхуа агентлаг Улаанбаатар хот дахь салбараараа дамжуулан МҮОХ-ны ерөнхий нарийн бичгийн дарга Э.Бадар-Ууганаас ярилцлага авлаа. Ярилцлагын агуулга удахгүй болох Бээжингийн өвлийн олимпын талаар байв. Ярилцлагыг сийрүүлэн хүргэе.

-Энэ удаагийн өвлийн олимпод Монгол Улс хэдэн тамирчинтай оролцох вэ?

-Одоогоор гүйлтийн цанын хоёр тамирчин эрхийн болзлоо хангаад байна. Тэшүүр, цана, биатлоны тамирчид маань олон улсад бэлтгэлээ ханган, олимпын эрхийн тэмцээн уралдаанд оролцож байна. Нэгдүгээр сарын 15-нд олимпод оролцох тамирчдын эрх эцсийн байдлаар баталгаажна.

-Албаны хэдэн хүн дагалдаж явах вэ?

-Энэ удаагийн олимпод Ковидын нөхцөл байдлаас шалтгаалаад дагалдах зочинг хассан. Тэгэхээр МҮОХ-ны төлөөлөл, спорт холбоодын төлөөлөл, тамирчин, дасгалжуулагч, эмч, сэтгүүлч гэсэн цомхон бүрэлдэхүүнтэй оролцоно.

-Зарим улс орны удирдлагууд өвлийн олимпыг дипломат аргаар бойкотлохыг уриалж байна. Та тамирчин байсан хүний хувьд, мөн МҮОХ-ны ерөнхий нарийн бичгийн даргын хувьд энэ асуудалд ямар байр суурьтай байна вэ?

-Спорт улс төрөөс ангид байх ёстой гэж Олон улсын олимпын хорооны хартид маш тодорхой заасан байдаг. Тиймээс олимпын наадмыг ямар нэг байдлаар бойкотлох нь буруу гэж бодож байна. Бид юуны өмнө олон жилийн турш хөлс, хөдөлмөрөө зарцуулсан тамирчдынхаа эрх ашгийг бодолцох ёстой. Бүх л олимпын хороод хамгийн түрүүнд тамирчдынхаа эрх ашгийг хамгаалдаг. Тэр ч утгаараа сая цар тахлын хүнд үед олимпын их гэр бүлийнхэн маань Токиогийн олимпыг тасалдуулалгүй амжилттай зохион байгуулсан. Дараагийн олимпын наадам ирэх онд Бээжин хотноо болно. Олимпын хороод маань дуу хоолойгоо нэгтгэж, олимпын наадамдаа амжилттай оролцоно гэдэгт итгэлтэй байна.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top