Н.ТӨГСЦОГТ: Ширүүн тулаан болох ч ялалтдаа итгэлтэй байна

Ц.Энхтүвшин, "Таван цагариг"

Монгол Улсын гавьяат тамирчин, сонирхогчдын боксын олимпийн наадам, дэлхийн АШТ-ий мөнгөн медальт, мэргэжлийн боксын IBO холбооны 57,2 кг жингийн дэлхийн аварга болж байсан, мэргэжлийн рингэнд 14 тулаан хийн 12 ялж (9КО), хоёр ялагдсан амжилттай яваа "King Tug" Нямбаярын Төгсцогт ердөө 11 хоногийн дараа буюу  2022 оны  нэгдүгээр сарын 22-нд рингэнд дахин гарч, ээлжит тулаанаа хийх билээ.

Өнгөрсөн долдугаар сард Төгсөө маань WBA-холбооны 58,9 кг-ийн жингийн Interim champion буюу түр аваргын бүсийг эзэмшигч Крис Колберттой жин өгсөн аваргын бүсийн төлөө тулалдан оноогоор ялагдсан билээ.

Харин энэ удаа манай Төгсцогтын өрсөлдөгч нь АНУ-ын боксчин , энэ жил 29 настай Виктор "Vicious" Пасильяс байх ажээ. Пасильяс нь өдгөөгөөс 10жилийн өмнө мэргэжлийн бокст орсон бөгөөд нийтдээ 17 тулаан хийж, 16 ялж( 9 КО) , нэг ялагдсан амжилттай боксчин байна.

Пасильяс өнгөрөгч нэгдүгээр сард WBA холбооны түр аваргын бүсийн төлөө тулалдан ТКО -оор ялагдсанаас хойш рингэнд гараагүй байгаа.
 

2021 онд түр аваргын бүсийн төлөөх тулаанд ялагдсан хоёр боксчин ийн тулалдахаар болжээ.  Төгсөө жин өгсөн тулалдсан бол Пасильяс доод жиндээ тоглосон.

Харин одоо 57,2 кг буюу feather weight-д өрсөлдөнө. Хэн ялсан нь цаашид аварга цол, бүсийн төлөө тулалдахад ойртоно. Тиймээс ч хэн хэнийх нь замналд тун чухал ач холбогдолтой тулаан болох тул үнэхээр гоё тулаан болох нь гарцаагүй.

Тулааны өмнө хоёр боксчин маань ийн ярьж байна.

В.Пасильяс: "Би Төгсцогттой хийх тулаанд бие, сэтгэл, бодлоороо бүрэн бэлэн байна. Рингэнд гармагцаа л гайхалтай тулаан үзүүлэх болно. Би хамгийн сайн тулаануудаа 57,2 кг жинд үзүүлж байсан. Энэ жинд би маш хүчтэйд тооцогдоно. Би яг одоо урьд өмнө нь хэзээ ч байгаагүйгээр ялалтаар " өлсөж", улам хүчтэй байна" гэсэн бол манай

Төгсцогт:" Сайхан боломж гарч, рингэндээ дахин гарах гэж байгаадаа сэтгэл хөдөлж, баярлаж байна. Эхнээсээ дуустал ширүүн тулаан болно,  фэнүүддээ дахин нэг гайхалтай тулаан үзүүлэхийг зорьж байгаа. Тулаан эхлэх анхны хонхны дуунаас л гал гарах бөгөөд харин энэ "дайнд" өөрийгөө ялна гэдэгтээ бүрэн итгэлтэй" байна хэмээн өгүүллээ.

Төгсцогт-Пасильяс нарын тулаан Нью Жерси мужийн Атлантик сити хотноо, "Borgata Hotel& Casino , spa" цогцолборт болох бөгөөд энэ үдшийн Co-main event юм.

Энэ үдшийн гол тулаан нь WBC-ийн 57,2 кг-ийн дэлхийн аварга Гэри Рассель (31 ялалт, 1 ялагдал) болон Филиппиний Марк Магсайо ( 23-0) нарын хооронд болно. Г.Рассель манай Төгсцогттой 2020 оны хоёрдугаар сард тулалдан аваргын бүсээ хамгаалснаас хойш ганц ч тулаан хийгээгүй байгаа билээ.

Мөн энэ үдэш домогт аварга Эвандер Холифилдын хүү Эван Холифилд (8-0) Крис Роллинстой рингэнд Гэри Рассель, манай "King Tug" нарын өмнө тулалдах аж.

Тулааныг Америкийн SHOWTIME тв суваг шууд дамжуулан үзүүлэх бөгөөд Америкийн цагаар 6 p.m PT/ 9 p.m ET -аас эхэлнэ. Мөн энэ тулааны үдшийн тасалбарыг ticketmaster.com -аас худалдан авах боломжтой юм.