Гено Петриашвили “Гран При Ярыгин”-д барилдахгүй

Энэ сарын 27-30-нд ОХУ-ын Красноярск хотод чөлөөт бөхийн “Гран-При Иван Ярыгин” тэмцээн болох гэж байна. Тэмцээний өмнө Гүржийн шигшээ багийн ахлах дасгалжуулагч Георгий Янтбелидзетэй Оросын сэтгүүлчид уулзан ярилцжээ.

-Гүржийн чөлөөт бөхийн од Гено Петриашвили Ярыгины нэрэмжит тэмцээнд ирдэггүй байснаа энэ жил оролцохоор боллоо. Яагаад?

-Оролцож чадахгүй болсон. Гено, Лаша Ломтадзе хоёр өвдөөд тэмцээнд орж чадахгүй. Уг нь бид зургаан бөхтэй Красноярск явах гэж байсан ч гурав нь өвдчихлөө. Италийн чансааны тэмцээн омикроноос болоод цуцлагдсан. Бид Геног Италийн тэмцээн, Ярыгины тэмцээний аль нэгэнд оролцуулах гэж байлаа. Ярыгины тэмцээнд хүчтэй өрсөлдөгч олон болохоор сонгосон ч харамсалтай нь манай бөх өвчин туссан.

- Гено Токиогийн олимпод тун харамсалтай ялагдсан.

-Гейбл Стивсонд ялагдсан талаар дурсахыг ч хүсэхгүй байна. Барилдааны эхнээс ялагдсан бол бас яахав. Гэтэл ялж яваад олимпын алтан медалиас хэдхэн секундын зайтай байхдаа ялагдсан. Ёстой шоконд орсон. Гено өөрөө ч их зовсон.

-Дараа нь ДАШТ-д Петриашвили Ираны Амир Заред ялагдсан. Ер нь Гено Петриашвили, Таха Акгуль хоёрын хүнд жин дэх ноёрхол дуусаж байна уу?

-Хамгийн гол нь Петриашвили тэгэж бодохгүй байгаа. Тэр өрсөлдөгчдөөсөө илүү гэдгээ харуулна. Парисын олимпод түрүүлэх хүсэлтэй байгаа. Олимпын алтаас бусад медаль түүнд бий.

-Өнгөрсөн улиралд Гүржийн баг тун амжилтгүй байлаа.

-Шигшээ багт ажилласан таван жилийн дотор би анх удаагаа ДАШТ-ий алтан медальгүй оныг өнгөрөөлөө. Бусад тэмцээнд ч олигтой барилдсангүй. Олимпын шинэ циклд амжилттай байна гэж найдаж байгаа. Шинэ залуус, алдарт ахмадууддаа итгэл хүлээлгэж байна.

-Европын АШТ-д оролцох багаа тодруулсан уу?

-Улсын аваргын тэмцээнээрээ бид шигшээ багаа гаргадаг. Ер нь ганц хоёр жингээс бусад жинд тодорхой байгаа.

-Тивийн аваргад хэрхэн бэлтгэх вэ?

- Бакуриани, Боржоми, Душетид 3 цугларалт хийнэ. Хоёрдугаар сард Дан Колов, Яшар Догу гэсэн хоёр тэмцээнд оролцоно.