Оросууд NBA, NHL, Премьер лигийн тоглолт үзэж чадахгүй

Украины нутагт халдсаны улмаас дэлхийн спортын ертөнцөд гадуурхагдан, ад үзэгдээд байгаа ОХУ дахин нэг хоригт өртлөө. Энэ удаад спортын телевизүүд хориг зарлаж, Оросын спорт сонирхогчид дуртай лиг, тоглолтоо үзэж чадахгүй болжээ.

Хойд Америкийн сагсан бөмбөгийн НБА лигийг ОХУ-д 2020 оноос эхлэн MEGOGO онлайн-кинотеатр гаргаж байжээ. Энэ сервисийг Украины бизнес эрхлэгчид үүсгэн байгуулсан бөгөөд энэ сарын 2-ноос ОХУ-аас гарч байгаагаа мэдээлсэн. Ингээд ОХУ НБА-гүй үлдсэн юм. НБА лигээс Орос дахь бүх үйл ажиллагаагаа зогсоож байгаагаа зарлаж, NBA.com сайт, NBA League Pass сувгаа ОХУ-д хаасан.

Мэргэжлийн хоккейн НХЛ лигийн тоглолтыг 2019 оноос Яндекс компани өөрийн платформ, Кинопоиск онлайн-кинотеатраар гаргаж, жилд 2 сая ам.доллар төлдөг байлаа. 2022 оны нэгдүгээр сард гэрээгээ хоёр жилээр сунгаад байв. Гэвч гуравдугаар сарын 1-нд НХЛ лигээс ОХУ-д гаргах эрхийг цуцалснаа мэдэгджээ.

Францын хөлбөмбөгийн лигээс албан ёсны цахим хуудсандаа энэ сарын 4-нөөс эхлэн МАТЧ ТВ сувагт олгосон дамжуулах эрхийг хүчингүй болгосноо мэдэгдсэн.

Евроспорт суваг Орост дамжуулах эрхээ хаагаагүй ч эдийн засгийн хоригийн улмаас орос хэрэглэгчид төлбөр төлөх банк байхгүй болжээ.

Английн Премьер лиг мөн ОХУ-д дамжуулах, гаргах эрхийг Okko, Матч ТВ-д өгсөн шийдвэрээ цуцлахаар ажиллаж байгаа гэнэ.