Фэйсбүүкийн сугалаанд мөнгөө алдсан иргэн амиа хорлохыг завджээ

Энэ сарын 13-ны өдөр Цэргийн төв эмнэлгийн Хордлогын үндэсний төвд олон тооны эм ууж, хордсон эмэгтэй хүргэгдэж иржээ.

Хохирогч эмэгтэй Сонгинохайрхан дүүргийн 20 дугаар хорооноос хүргэгдэж ирсэн бөгөөд тэрбээр найзындаа байх үедээ олон тооны эм ууж, амиа хорлохыг завдсан байна.

Хохирогч эмэгтэй эм уух болсон шалтгаанаа тайлбарлахдаа "Фэйсбүүкийн сугалаанд оролцож, их хэмжээний мөнгө алдсан учраас амьдрахыг хүсээгүй" гэжээ. Одоогоор дээрх эмэгтэй хордлого тайлах эмчилгээ хийлгэж байгаа ба биеийн байдал нь сайжирсан байна.

Дашрамд сануулахад, сүүлийн жилүүдэд цахим орчинд олны танил хүмүүс болон зарим группийн админууд хууль бусаар эд бараа амлаж, иргэдийн дунд сугалаа явуулах болсон. Энэ нь цахим залилангийн нэг хэлбэрт тооцогддог бөгөөд өнөөдрийн байдлаар хохирогчдын тоог тогтоох боломжгүй байна гэдгийг албаныхан хэлдэг.

Энэ төрлийн залилан нь олны танил хүн, төсөл хөтөлбөрийн нэрийг барьж цахим орчинд дагагчдын тоогоо нэмэгдүүлж, тэдний дунд уралдаан зарлах,  зэргээр итгэлийг  олж авдаг. Улмаар таны сэтгэл хөдлөлд тулгуурлан, түргэн баяжих боломжийг санал болгож, үүндээ хөрөнгө оруулахыг хүсдэг. Эцэст нь иргэд эд хөрөнгөөрөө хохирдог бөгөөд хохирсон тохиолдол бүрт хуулийн байгууллагад ханддаггүй байна.