Хифүми Абэ: Би төгс жүдоч болмоор байна

Саяхан болж өнгөрсөн Японы аварга шалгаруулах жүдо бөхийн тэмцээнд түрүүлсэн Хифүми Абэтэй сэтгүүлчид уулзан ярилцжээ. Тэрээр өөрийн гол өрсөлдөгч Жёоширо Марүямаг финалд ялсан юм. Аравдугаар сарын 6-13-нд Узбекистанд болох дэлхийн аваргын тэмцээнд хоёр тамирчин хамтдаа явна.

-Сэтгэгдлээ хуваалцаач.

-Сэтгэл хангалуун байна. Өөрийнхөөрөө барилдаж чадсан гэж бодож байгаа. Токио олимпын үеэр би хэрхэвч ялагдаж болохгүй гэсэн их дарамттай барилдсан. Өнөөдөр ч гэсэн дарамт байлаа. Гэхдээ би тайван барилдаж чадлаа. Форм сайтай байгаа болохоор итгэлтэй байлаа.

-Финалын барилдаанд Марүяматай барилдсан. Юу бодож байв?

-Би зөвхөн дэлхийн аварга биш, бас олимпын аварга хүн. Татамид гарахдаа яасан ч ялагдахгүй гэж бодсон. Ялалтын төлөө урагш дайрна, олимпын аварга гэдгээ харуулна гэж бодож байлаа.

-Олимпын аварга болоод таны өөртөө итгэх итгэл нэмэгдсэн үү?

-Тиймээ, би өөртөө, барилдаандаа улам итгэлтэй болсон. Өмнө нь яг ялна гэсэн итгэл сул байлаа. Харин одоо би өөрчлөгдсөн, олон дутуу зүйлээ нөхөн авч чадсан.

-Марүяматай удаан барилдана гэж бэлтгэсэн үү?

-Барилдаан хэрхэн өнгөрөхийг таамаглаагүй. Ямар цомын төлөө өрсөлдөж байгаа нь хамаагүй, ялах л хүсэлтэй байлаа.

-Та өрсөлдөгчдөө таарсан сөрөг довтолгоо хийж чадсан.

-Бид хоёр олон удаа таарч барилдсан. Энэ удаагийнх сөрөг доволгоо биш, миний довтолгоо байсан гэж би бодож байна.

-Олимпын дараа олон тамирчин урт хугацаагаар амардаг. Таны хувьд?

-Олимпын дараа хүч чадал дүүрэн байсан болохоор урт амралт хэрэггүй байлаа. Даанч бага зэрэг гэмтэл авсан болохоор нэг сар амраад Парисын олимпын бэлтгэлдээ орсон.  Шинэ шинэ ялалт байгуулах хүсэл төрсөн.

-Таны энэ жилийн төлөвлөгөө?

-Хөлний ажиллагаагаа сайжруулах бэлтгэл хийнэ. Ер нь хийх сурах юм их байна. Би өв тэгш жүдоч болмоор байна. Токиогийн олимп амжилттай болсон ч миний аян замын дөнгөж эхлэл нь байсан.