Хакүход ДЭВЖЭЭ НЭЭХ ЭРХ өгөөгүй нь ялгаварлан гадуурхсан хэрэг

Сүмо бөхийн холбооноос 20-иос олон түрүүлж, их аварга болсон хүнд өөрийн нэрээр дэвжээ нээхийг зөвшөөрдөг. Сүмогийн түүхэнд их аварга 6-хан бий. Үүнээс 32 түрүүлсэн Тайхо, 24 түрүүтэй Китаноми, 22 түрүүтэй Таканохана нар эрхээ ашиглаж, дэвжээ нээсэн. Харин 31 түрүүтэй Чиёонофүжи Коконоэ дэвжээг өвлөн авах болсон тул нэрээрээ дэвжээ нээгээгүй юм.

25 түрүүтэй Асашёорюү Японы иргэн болоогүй тул дэвжээ нээх эрхгүй байлаа. Харин сүмо бөхийн бараг бүх амжилтыг эвдэж, 45 түрүүлсэн их аварга Хакүход холбооноос дэвжээ нээх эрх өгөөгүй билээ. Энэ талаар Японы хэвлэлд гарсан нийтлэлийг хүргэж байна.

News-postseven

Шинэ ёкозүна Тэрүнофүжигийн ёкозүна цолтой анхны түрүүгээ авсан мэдээг их аварга Хакүхогийн гэнэт зодог тайлсан мэдээ дарсан нь Намрын тэмцээн өндөрлөсний дараахь өдөр байлаа. 45 түрүүлсэн их аварга ч түүнийг зодог тайлсны дараах амьдралын талаар Сүмо бөхийн холбоо тун таагүй шийдвэр гаргасан юм.

Төмөр замын Хаката өртөөнөөс хурдан галт тэргээр 20 минут, буугаад 3 минут алхахад таны өмнө Нонзоин хэмээх сүмо гарч ирнэ. Энэхүү сүмийн тэргүүн Хаяаши Какүжёо бол их аварга Хакүхогийн Миягино дэвжээний Кюүшюү дэх дэмжигчдийн нийгэмлэгийн хүндэт ерөнхийлөгч, Кюүшюү башёг зохион байгуулахад оролцдог “Кюүшюү тамарикай” нийгэмлэгийн тэргүүн асан, том ивээн тэтгэгч. Тус сүм Миягино дэвжээний бөхчүүдийг Кюүшюүд ирэхэд нь байрлуулан, бэлтгэл хийлгэдэг, олон жил Хакүхог дэмжиж ирсэн газар юм.

Манай сэтгүүлч Хаяаши Какүжёотой уулзан ярилцлаа.

“Маш их түүхэн рекорд тогтоосон ёкозүна шүү дээ. Урьд өмнө хориос дээш түрүүлсэн ёкозүнад Ичидай Тошиёри цол өгч, өөрийн нэрээр дэвжээ нээхийг зөвшөөрдөг байсан. Гэтэл холбооны зөвлөлөөс Хакүхог Ичидай Тошиёри болоход хангалтгүй гэж үздэг байгаа. Энэ бичгийг нь таньдаг өмгөөлөгчдөө үзүүлтэл “Энэ бол яс үндсээр ялгаварлан гадуурхсан хэрэг” гэж хэлсэн. Хэрэв Хакүхо япон хүн байсан бол эрх өгөх л байсан. Сүмо бөхийн холбоо иймэрхүү л газар даа” гэж тэр хэллээ.

Есдүгээр сарын 29-нд зодог тайлсан Хакүхо маргааш нь буюу 30-нд Магаки ояката болсон. Харин Хаяаши Какүжёогийн хэлсэн Ичидай Тошиёри гэдэг нь өөрийн нэрээр Хакүхо ояката болно гэсэн үг байв. Үнэхээр жинхэнэ их аваргуудад л өгдөг эрх. 32 түрүүлсэн Тайхо, 24 түрүүлсэн Китаноүми, 22 түрүүлсэн Таканохана нар ийм эрх авч байсан. Тэгвэл 45 түрүүлсэн Хакүход өгөх нь зайлшгүй зүйл. Сүүлийн үед гэмтэл бэртэл ихсэн, зодог тайлах нь ойртлоо гэж Хакүхогийн талаар ярьж эхэлсэн 2021 оны дөрөвдүгээр сард Сүмо бөхийн холбооны “Сүмо бөхийн уламжлалыг хадгалан хөгжүүлэх шинжээчдийн зөвлөл” гээчээс холбооны тэргүүн Хаккакүд Ичидай Тошиёри олгох үндэслэл алга гэсэн бичиг гардуулснаар байдал өөрчлөгдсөн юм. Энэхүү зөвлөлийг 2017 онд тэр үеийн ёкозүна Харүмафүжигийн хэрэг гарсны дараа 2019 онд байгуулсан. Зөвлөлийн бичигт “Гадаад бөхчүүд хэрэг төвөг их гаргадаг тул тэднийг удирдах, хянах ажлыг сайжруулах хэрэгтэй. Ичидай Тошиёри олгох одоогийн журам хангалтгүй” гэж заасан байлаа.

“Хакүхог зодог тайлахыг хүлээж байсан мэт журмаа өөрчилсөн хэрэг. Ёс зүйн асуудал байн байн сөхөгддөг тул түүнд дэвжээ нээх эрх өгөх ёсгүй гэсэн бодолтой холбооны ояката олон байсан. Харин энэ бичиг тэдний бодлыг дэмжсэн зүйл байлаа” Сүмо сэтгүүлч    

Зөвлөлийн энэ шийдвэрээр Хакүхогийн өөрийн дэвжээтэй болох мөрөөдөл хийсэн алга болсон. Хакүхог зодог тайлахын өмнө Сүмо холбооныхны дунд “Хаяаши Какүжёо холбооны тэргүүн Хакккаүтай энэ бичгийн улмаас маргалдаж, “Кюүшюү тамарикай” нийгэмлэгийн тэргүүнээсээ солигдсон” гэсэн яриа гарсан байв. Энэ талаар тодруулахад Хаяаши үнэхээр тэргүүний ажлаа өгснөө хэлээд сүмогийн холбоонд юу болсон талаар ярилаа.

Сүмогийн холбоо дампуурсан газар

Хаяаши Какүжёо “Долоодугаар сарын тэмцээний өмнө охин минь Хакүход Ичидай Тошиёри олгохгүй болсныг эсэргүүцсэн захидлыг Хаккакү оякатад илгээсэн юм. Гэтэл хачин хариу ирдэг байгаа. Намайг Кюүшюү дэх “Кюүшюү тамарикай” тэргүүний ажлаа өг гэж шаардсан байлаа. Захидлыг охин минь бичсэн. Захиандаа “Миний аав Кюүшюү дэх “Кюүшюү тамарикай” нийгэмлэгийн тэргүүн” гэсэн ганцхан өгүүлбэр оруулсан байсан. Охин минь Хаккакү оякататай уулзаж байсан ч мартсан байж магадгүй гээд биччихжээ...”

Сүмод орон нутгийн башёг зохион байгуулахад онцгой эрх аван хамтардаг нутгийн нийгэмлэг байдаг. “Кюүшюү тамарикай” бол Кюүшюү башёд оролцдог бөгөөд өөрөөр хэлбэл ивээн тэтгэгч юм. Холбоог дэмждэг, нутгийн томчууд нэгдсэн байгууллага тул тэр ивээн тэтгэгч байгууллагын тэргүүнийг ажлаа өг гэж шаардах нь үнэхээр муйхар хэрэг байлаа.

“Кюүшюү башёг хариуцсан ояката манай оффист утасдаж, ийм бодолтой тэргүүнтэй газартай хамтран ажиллахгүй” гэж хэлсэн гэсэн. Дараа нь Хаккакү тэргүүнээс захиа ирсэн. Захианд Хакүход Ичидай Тошиёри олгох ёстой гэдэг нь танай “Кюүшюү тамарикай” нийгэмлэгийн бодол уу, Хаяаши тэргүүний бодол уу гэж асуужээ. Хэнийх нь ч биш, охины минь, хувь хүний бодол гэж хэлээд тэд ойлгоогүй. Охины захидалд “Хакүхо дэвээ нээх эрх авах ёстой. Өгөхгүй бол энэ нь үндэс угсаагаар ялгаварласан хэрэг болно” гэж бичсэнийг холбооноос айлган сүрдүүлсэн явдал гэж үзсэн. Харин ч намайг тэргүүний ажлаа өг шаардсаныг нь би сүрдүүлэг гэж үзэж байгаа. Гэхдээ нийгэмлэгийн бусад гишүүдээ бодоод эрүүл мэндийн шалтгаанаар гэж хэлээд ажлаа өгсөн”

Манай сэтгүүлч “Кюүшюү тамарикай” нийгэмлэгт хандаж, Холбооноос ирсэн захиаг үзүүлэхийг хүссэн ч “Захиа ирсэн нь үнэн. Агуулгыг мэдэхгүй. Хаяаши тэргүүн эрүүл мэндийн шалтгаанаар ажлаа өгсөн” гэсэн хариулт авлаа.

Энэ асуудлын талаар Хаяаши Какүжёо Хакүход өөрт нь ч тайлбарласан байна.

“Хакүхо их гайхсан ч юу ч хэлээгүй. Хакүхо хүн муулдаг хүн биш. Гэхдээ би Миягино дэвжээг сүмдээ байрлуулан дэмжсэн хэвээр байх болно гэдгээ хэлсэн”

Тэрээр Сүмо бөхийн холбоонд урам хугарснаа нуусангүй.

“Сүмогийн холбоо туслаж дэмжиж ирсэн хүнээ шууд л хөөгөөд гаргачихдаг газар. Бодол саналыг нь огт хүлээж авдаггүй. Кюүшюү башёд тасалбар зарагдахгүй үед манай нийгэмлэгийн гишүүдийг худалдаж аваач гэж ичих юмгүй хэлдэг байсан мөртлөө бага зэрэг шүүмжлэхэд л гаргаж орхино. Манай нийгэмлэгийн хэд хэдэн гишүүн гарсан. Хэнийг ч сонсдоггүй ийм л дампуу холбоо. Манай сүм Кюүшюүд сүмо бэлтгэл хийх таван газар гаргаж өгдөг байлаа. Сүмо бөхийн холбооны төлөө шүү дээ”

Сүмогийн холбооноос яагаад Хаяаши Какүжёо тэргүүний ажлаа өгсөн талаар тодруулахад “Хариулт алга” гэсэн л хариу өглөө.