ААШТ: Киргиз бөхчүүдэд нэг талын зардал л гаргаж өгчээ

Улаанбаатарт болж байгаа Азийн аварга шалгаруулах чөлөөт бөхийн тэмцээнд оролцож байгаа Киргизийн бөхчүүдийн адал явдал үргэлжилсээр байна.

Тэдний замын зардлыг Сангийн яамнаас нь гаргаж өгөхгүй байсан тул тэмцээнд оролцож чадахгүй болох тун дөхсөн. Яамнаас бөхчүүдийг сан байгуулан, хандив цуглуул гэж хэлсэн байдаг.

Харин парламентэд депутатууд энэ талаар ярьж байж, замын зардал гаргуулан, Улаанбаатарт ирж амжсан билээ. Тэгвэл бөхчүүдийн замын зардлын талыг л гаргаж өгсөн байжээ.

Депутат Тазабек Икрамов парламентын хурал дээр “Бид Азийн АШТ эхлэхээс 2 хоногийн өмнө мөнгө олж чадсан. Гэтэл Сангийн яамнаас тамирчдын Монголд очих онгоцны зардлыг л гаргасан байлаа. Хоол унд, буцах тасалбар гээд өөр олон зардал байна. Одоогийн байдлаар мөнгийг шилжүүлээгүй байна. Санхүүгийн бэрхшээлтэй байгаа ч манай бөхчүүд Азийн наадамд тун сайн барилдаж байгаа” гэж мэдэгдлээ.