"Ханжоу-2022" Азийн наадам хойшиллоо

БНХАУ-ын Үндэсний олимпын хороо, Азийн олимпын зөвлөлийн хамтарсан хуралдаан өнөөдөр (2022.05.06) болж, цаг үеийн асуудлыг хэлэлцэн шийдвэрлэлээ.

Уг хурлаар "Ханжоу-2022" Азийн наадмыг хойшлуулах шийдвэр гарсан байна. Азийн наадам ирэх есдүгээр сарын 10-25-нд болох товтой байсан юм. 

Азийн олимпын зөвлөлөөс Азийн наадмын шинэ товыг ойрын үед зарлахаа мэдэгджээ. 

Түүнчлэн арванхоёрдугаар сарын 20-28-нд БНХАУ-ын Шантоу хотноо болох байсан Азийн залуучуудын наадмыг мөн цуцлахаар боллоо.

Өнгөрсөн жил зохиогдох ёстой байсан тус наадам коронавирусийн цар тахлын улмаас нэг жилээр хойшилсон ч өдгөө бүрмөсөн цуцлагдсан байна. Дараагийн залуучуудын Азийн наадам 2025 онд Узбекистаны Ташкент хотноо болно.

БНХАУ-д цар тахлын аюул нүүрлэсэн хэвээр байгаа тул дээрх шийдвэрүүдийг гаргажээ.

Эх сурвалж: МҮОХ