Китанофүжи: Энэ гурван озэкиг байхгүй гэж бодоод тэмцээнээ үзээрэй

Мэргэжлийн сүмо бөхийн 52 дахь ёкозүна, NHK телевизийн сүмо тайлбарлагч Китанофүжи “Чюүничи Спорт” сонинд өөрийн хөтөлдөг булантай. Түүний булангаар зочилцгооё.

“Китанофүжи булан”

Өчигдөр би сонирхолтой сайхан барилдаан болж байвал том цолтнууд ялагдсан ч хамаа алга гэж бичсэн. Гэхдээ аливаа юманд хязгаар гэж бий. Яаж ч муудлаа гээд гурван озэки бүгд нэг өдөр хамтдаа унана гэж байх ёсгүй.

Ялагдаж байгаа нь ч арай хэтэрхий. Өчигдөр би NHK радиод тайлбар хийлээ. Шёодай, Дайэйшёогийн барилдааны өмнө хөтлөгч надаас ямар барилдаан болох бол гэж асуулаа. “Шёодай урагш дайрах гэж оролдоход нь Дайэйшёо хоолойд нь гараа тулгаад л түлхээд тэр дор нь гаргачихна” гэж хэлтэл яг л тийм барилдаан боллоо. Миний хэлснээр байгаа биз гэж онгирмоор байлаа ч эсрэгээрээ сэтгэлээр уналаа. Ижил мэхэнд хэдэн удаа унаж байж ухаан суух юм бэ? Яагаад үүнийг ойлгодоггүй юм бол? Хэлээд ч нэмэр алга. Дураараа барилд гээд орхисон нь дээр бололтой. Итгэл найдвар хүлээлгэж байгаа хүмүүс нь тэнэг харагддаг болчихлоо.  

Митакэүми ч өвдөг шороодлоо. Бага ч гэсэн урагш явсан гэж өмгөөлж болох ч саяхан дээд зиндаанд дэвшсэн залуу бөхөд ингэж ялагдаж байгаа озэкиг дараагийн ёкозүна гэж хэлэхэд үнэхээр хэцүү. Цол бага бөхчүүдтэй муу барилддаг төдийгүй үнэндээ нэг их хүчтэй сүмоч биш байж ч мэдэх юм. Озэки цол авч байх үедээ өөртөө таарсан бэлтгэлийн шинэ аргатай болсон гэж итгэл төгс ярьж байсан ч үр дүн гарахгүй байна. Илүү дутуу юм эзэмших гэж оролдсоноос жирийн бэлтгэлээ тогтвортой хийгээд явж байсан нь дээр байж мэдэх юм. Хүний хэлсэн үгийг бага ч гэсэн сонсдог байгаасай.

Такакэйшёо нэг л хачин байна. Мөргөлт нь сулхан, бие нь хатуу, хүч чадалгүй. Ялагдчихаад хор шар нь хөдлөж байгаа нь харагддаг байсан бол одоо үгүй. Ер нь шууд хэлэхэд барилдах хүсэл алга. Ийм хүнийг шүүмжлэх хүсэл ч төрөхгүй юм.

Эхний гурван өдрийн барилдааны дараа гурван озэки нийлээд дөнгөж 2 даваатай. Ахиад 12 өдрийн барилдаан биднийг хүлээж байна. Озэки нарт юу тохиолдоо вэ? Бодохоос ч аймар юм. Гэмтэл бэртлээр дүүрэн ёкозүна Тэрүнофүжид л найдахаас өөр аргагүй болсон Сүмо бөхийн холбоо тун хэцүү байдалд байх шиг.

Энэ башёг Вакатакакагэ, Котоновака, Хоошёорюү, Дайэйшёо гэсэн залуус, ахмад бөх Тамаваши нар л сонирхолтой болгох байх. Маргаашнаас эхлээд би гурван озэкигийн талаар юу ч хэлэхгүй. Даралт ихсээд байна. Үзэгч олон ч гэсэн энэ гурван арсланг барилдалгүй өнжсөн гэж бодоод тэмцээнээ үзсэн нь дээр шүү. Залуу бөхчүүд тэднээс илүү сайхан барилдаан үзүүлнэ.