Чөлөөт бөх: Шүүгчийг зодсон бөхийг бүх насаар нь хөөлөө

Өнгөрсөн мягмар гарагт Нью-Делид Их Британийн эзэмшилд байсан орнуудын наадам буюу Хамтын нөхөрлөлийн орнуудын наадамд оролцох шигшээ багийн сонгон шалгаруулалт боллоо.

Дөрвөн жилд нэг удаа явагддаг энэхүү тэмцээн нь энэтхэг бөхчүүдийн хувьд маш том тэмцээн юм. Наадам долоодугаар сарын 28-наас наймдугаар сарын 8 хүртэл Бирмингемд болно.

Наадмын сонгон шалгаруулалтын барилдаанд түрүүлсэн Рави Кумар (57 кг), Бажранг Пуния (65 кг), Дипака Пуния (86 кг), Навин (74 кг), Дипак (97 кг), Мохит Гревал (125 кг) нар эрхээ авсан байна.

Сонгон шалгаруулалтын үеэр хүнд жингийн финалын барилдааны дараа шүүгчийн биед халдсан хэрэг гарлаа.
 

Сатендер Малик 3:0 харьцаатай Мохитийг тэргүүлж яваад 18 секунд дутуу байхад ардаа алдаж, улмаар түлхүүлэн дэвжээнээс гарсан байна. Эхлээд шүүгч хэвтээд шилжүүлсэн Мохитод 1 оноо өгсөн ч видео бичлэг үзээд 2 оноо болгосон. Ингэснээр онооны харьцаа 3:3 болж, сүүлд оноо авсан Мохит ялалт байгууллаа. Энэ шийдвэрт дургүйцсэн Малик шүүгчийг цохьсон байна. Ингээд Энэтхэгийн бөхийн холбооноос Маликийн барилдах эрхийг бүх насаар нь хаслаа.