Моллаи Азербайжаны төлөөх анхны барилдаанаа Монголд хийнэ

Иранаас Монголд шилжиж, Токио олимпын мөнгөн медаль хүртсэн жүдоч Саид Моллаи иргэншлээ сольж, Азербайжаны нэрийн өмнөөс барилдах болсон нь энэ сарын гол үйл явдлын нэг байлаа.

Саид хэдий Иранд төрсөн ч азербайжан гаралтай. Дээр нь ижилхэн исламын шашинтай тул Азербайжанд амьдарч, бэлтгэл хийхэд Монголоос илүү дөхөмтэй байх нь мэдээж. Монгол Улсад олимпын мөнгөн медаль авчирсан тэрээр ямар ч гэсэн Монгол оронд талархал илэрхийлээд мордсон юм.

Саид “Би сүүлийнхээ олимпод Азербайжаны нэрийн өмнөөс оролцох боломжтой болсондоо маш их баяртай байгаа. Парист би Токиогийн мөнгөн медалиасаа илүү амжилт гаргана гэж найдаж байна. Монголын жүдогийн шигшээ багт миний жинд маш сайн хоёр тамирчин байгаа. Тэдэнд олимпод оролцох боломж олгохыг би хүссэн. Азербайжаны өмнөөс барилдахад надад их тохирч байгаа. Яагаад гэвэл манай гэрбүл Азербайжан гаралтай. Би хэл, соёлыг нь мэднэ.  Монголын ард түмэн, Монголын жүдо бөхийн холбоонд баярлалаа” гэж хэлсэн билээ.
 

Түүнийг дөрөвдүгээр сард Болгарын Софид болсон Европын аварга шалгаруулах жүдо бөхийн тэмцээнд Азербайжаны өмнөөс барилдуулах гэсэн боловч бичиг баримтаа бүрдүүлж амжаагүй. Ирэх зургаадугаар сарын 3-5-нд Тбилисид явагдах Гүржийн Их Дуулгад оролцоно гэж байсан ч энэ удаад бэлтгэл дутуу гээд барилдахгүй болов.

Ингээд Азербайжаны жүдо бөхийн холбооноос Саид Моллаиг ирэх сарын 24-26-нд болох Улаанбаатарын Их Дуулга тэмцээнд сойхоор шийджээ.

Саидын ойрын гол зорилго бол наймдугаар сард Туркт болох Исламын орнуудын наадамд түрүүлэх явдал. Түүнээс өмнө формдоо орох нь чухал. Азербайжаны шигшээ багийн анхны барилдаанаа хуучин орон Монголдоо хийнэ гэдэг хувь заяа гэлтэй.  
 

Улаанбаатарын Их Дуулгад оролцохоор түүний найз, Израилын жүдоч Мүки Саги мэдүүлгээ өгсөн байгаа. Иранд байхад нь Саидыг израиль тамирчинтай барилдахыг хориглодог байсан бол Монголд байхдаа тэр Сагитай огт учраа таараагүй. Ингээд Саид, Саги хоёрын анхны учраа, өрсөлдөөн Улаанбаатарт болох магадлал өндөр боллоо.