UFC 275: Дана Батгэрэл оноогоор ялагдаж, Йоанна Енжейчик зодог тайллаа

Холимог тулааны UFC холбооноос зургаадугаар сарын 12-нд Сингапурын “Singapore Indoor Stadium” цогцолборт UFC 275 тэмцээнийг зохион байгууллаа.

Энэ тэмцээнд хагас хүнд жингийн аварга, Бразилын Гловер Тейшейра, чансааны 2-т бичигдсэн Чехийн Иржи Прохазкатай тулалдаж, ялагдсан бол эмэгтэй хөнгөн жингийн аварга Валентина Шевченко чансааны тавын тулаанч Бразилын Тайла Сантостой бүс хамгаалах тулаан хийсэн. Маш хүнд тулааны эцэст Шевченко аварга цолоо хадгалж үлдлээ. Харин Хятадын Жан Вейлигээс даагаа нэхэхээр гарч ирсэн Польшийн Йоанна Енжейчик хүнд цохилтоор ялагдав.

Тулааны дараа Йоанна “Би өөрөөрөө бахархаж байна. Хүнд хэцүү тулаан болно гэдгийг би мэдэж байсан, бэлтгэсэн. Түүний эргэлттэй цохилт гайхалтай байлаа. Ба баг хамт олон, дасгалжуулагч нар, менежер, гэр бүлдээ талархаж байгаагаа хэлье. Би энэ холбоонд хайртай. Дана, Лоренцо, Хантер ялж чадаагүйд уучлаарай. Би 20 жил тулалдлаа. Би одоо 35 настай. Би бизнес эрхлэгч болмоор байна, би ээж болмоор байна” гэж хэлсэн юм.

UFC холбооны Монголын анхны тулаанч Дана Батгэрэл Өмнөд Солонгосын Кан Кён Хотой тулалдлаа. Тулаан гурван үе үргэлжилж, шүүгчдийн саналаар (29–28, 29–28, 29–28) солонгос тулаанч ялалт байгууллаа.