Дарья Белодед: Оросуудыг олимпод оруулахгүй гэж найдаж байна

Олимпын хүрэл медальт, дэлхийн хошой аварга, Украины жүдоч Дарья Белодед юүтүүбийн Parimatch Ukraine сувагт ярилцлага өгөхдөө орос тамирчдыг олимпод оролцуулахгүй байх ёстой гэж байр сууриа илэрхийлсэн байна.

Дарья “Дайн эхэлснээс хойш би орос тамирчидтай харилцаагүй. Жирийн танил 2-3 орос тамирчин бий. Найзууд биш л дээ. Тэднээс хэн нь ч надад захидал бичээгүй, хандаагүй. Хэн нь ч дайны эсрэг үг хэлээгүй, яриагүй тул би тэдэнд урам хугарсан гэж хэлж болох юм. Ер нь би оросуудыг спортын салбарт төдийгүй зарчмын хувьд огт хармааргүй байна. Орос жүдочдыг олон улсын тэмцээнд оролцуулах зөвшөөрөл гарахад бид шоконд орсон. Яагаад гэвэл жүдо оросуудыг тэмцээндээ оруулсан анхны спортын төрөл байлаа. Яагаад? Олон улсын жүдо бөхийн холбооны тэргүүн Мариус Визер олон орос танилтай, оросууд олон тэмцээнийг ивээн тэтгэж байсан болохоор тэр биз. Энэ бол шударга бус зүйл. Бид оросуудыг дахин тэмцээнд оруулахгүйн тулд тэмцэж байна. Парис олимпын сонгон шалгаруулалт эхлэнгүүт Монголын тэмцээнд орос жүдочид оролцсон. Хэрэв оросуудыг оруулаад байх юм бол бид IJF-ийн тэмцээнд оролцохгүй. Гэхдээ манай шигшээ баг бэлтгэлээ хийсээр байгаа. Аравдугаар сард болох ДАШТ-д оросуудыг оролцуулахгүй гэдэгт итгэж байна. ОХУ-ын маш олон тамирчин цэргийн албан хаагч. Тэд эх орондоо зүтгэх үүрэгтэй, өөрөөр хэлбэл дайныг дэмжиж байгаа улсууд. Спортод ийм зүйл байж болохгүй. 2024 оны олимпоос оросуудыг хасах эсэхийг би хэлж мэдэхгүй. ОУОХ-ны ерөнхийлөгч Томас Бахаас их зүйл хамаарна. Мөн дэлхийн улс орнууд түрэмгийллийн эсрэг хэрхэн хандах нь их нөлөөтэй. Олон хүчин зүйл байгаа ч би орос тамирчдыг олимпод оруулахгүй гэж найдаж байгаа” гэж ярьжээ.