Махмадбек Махмадбеков: ОХУ-ын жүдочдыг ДАШТ-д оролцуулах ёстой

Олон улсын тэмцээнд оролцох эрхээ хасуулаад байгаа ОХУ-ын тамирчид энэ өдрүүдэд Бүх ард түмний спартакиад тэмцээнээ зохион байгуулж байна. Тэмцээнд бокс, чөлөөт бөх, жүдогийн шилдэг тамирчид нь бүгд зодоглож байгаа юм.

Эрэгтэй 73 кг-ын жинд түрүүлсэн Махмадбек Махмадбеков тэмцээний дараа Матч ТВ телевизийн сэтгүүлчид ярилцлага өгчээ.

-Таныг спартакиадад түрүүлнэ гэж олон шинжээч үзэж байсан. Үнэхээр түрүүлж чадлаа.

-Би сарын дараа болох дэлхийн аваргын тэмцээний бэлтгэлдээ гараад байсан. Биднийг ДАШТ-д оруулна гэж найдаж байгаа. Яг формдоо ороод байтал долоо хоногийн өмнөөс ёстой хараал хүрчих шиг болсон. Дөрвөн өдөр дараалан өдөр бүр л нэг юмаа гэмтээж байлаа. Хамгийн сүүлд тархиа хагалсан. Цусаа хараад сууж байхдаа “Ядарч байна шүү. Спартакиадад барилдах ямар хэрэг байна” гэж бодож байсан ч дасгалжуулагч ДАШТ-ий өмнө тэмцээнд оролцсон нь дээр гэж үзсэн юм. Эхний барилдаанаас л маш хэцүү байлаа. Цаг сунгаад л ядарч унах дөхсөн. Өвчин намдаагч тариад, өвдөг, хуруу, гар, толгой бүгд боолттой. Ариун цэврийн өрөөнд орж бөөлжчихөөд л гарч барилдана. Тэссээр байгаад нэг юм түрүүллээ.

-ОХУ-ын багийг ДАШТ-д оролцуулахгүй бол яах вэ?

-Оруулах ёстой. Спортыг улс төртэй хутгаж болохгүй. Монголд болсон тэмцээнд бид Олон улсын жүдо бөхийн холбооны төлөөлөгчтэй уулзсан. IJF холбоо биднийг ямар ч хэлбэрээр хамаагүй барилдуулахыг хүсэж байгаа. Далбаа, сүлд дуулалгүй барилдсан ч бүгд биднийг орос гэж мэднэ шүү дээ. Монголд болсон тэмцээнд манай тамирчдыг ад үзэх, муухай харах явдал огт байгаагүй.