Артас Санаа архигүй хурим хийлээ

“Архи, согтууруулах ундаа хэрэглэх нь хэзээ ч Орос, Тувагийн ард түмний уламжлал байгаагүй. Нүүдэлчдийн амьдралын хэв маяг бол эрүүл амьдрах ёс. Тува ёсоор бол шимийн архийг 40 нас хүрээд дөнгөж амсдаг байсан. Тиймээс 2022 оныг “Ардын зан заншлын жил” болгон зарласантай холбогдуулан, Архигүй хурим хийхээр шийдлээ” гэж Тувагийн уугуул, олимпын медальт, Артас Санаа мэдэгдсэн юм. Гэргий Анжелика нь энэ саналыг дэмжиж, баярын ширээндээ архи огт тавьсангүй.

Сүүлийн үед ОХУ, Тувад архидалт нэмэгдэж байгаа. Артас Санаа “Спорт, амжилт, эрүүл мэнд бол согтууруулах ундаанаас тусдаа зүйл. Хэчнээн хүний хувь заяа архинаас болж баларсныг тоолохын аргагүй. Алдартай тамирчин, нэртэй жүжигчин, эрдэмтэн мэргэд ч архины хараалд унаж байсныг бүгд мэднэ. Түүхэнд буу зэвсгээр ялж чадаагүй ард түмнийг архиар дийлж байсан талаар бичсэн байдаг. Хурим бол шинэ амьдралын бэлгэ тэмдэг. Шинэ амьдралаа архиар эхэлж таарахгүй. Архидан согтууралт, агсан, зодооноос шинэ амьдралаа эхлүүлж болохгүй. Архи байхгүй бол хурим дээр хэрүүл зодоон гарах магадлал бараг 100 хувь алга болдог. Нүүдэлчдийн ёс, уламжлалаа даган, хурим, баярын ёслолуудаа архигүй хийхийг уриалж байна” гэж ярьсан байна.