Challenge Cup: Монгол – Саудын Арабт 0:3 ялагдлаа

Киргизийн Чолтон-Ата хотод энэ сарын 29-нөөс есдүгээр сарын 4-ний өдрүүдэд Азийн Волейболын Холбооны 3 дахь удаагийн "Челленж Цом-2022" тэмцээн явагдаж байна. Тус тэмцээнд Саудын Араб, Монгол, Узбекистан, Киргизийн багууд өрсөлдөж байгаа билээ.

Эхний тоглолтдоо талбайн эзэн Киргизийн багийг илүүрхэж, 3:0 (21–25, 25–27, 14–25) ялсан Монголын шигшээ баг өнөөдөр Саудын Арабын багтай учраа таарлаа. Арабууд өчигдөр Узбекистаныг 3:2 буулган авсан байсан юм.

Нуруу өндөр Саудын Арабын баг эхний үеэс тэргүүлж эхэлсэн. Манай баг үеийн төгсгөлд 20:21 болгон барьсан ч 22:23 байх үед Хангал давуулалт алдан 22:24 боллоо. Гэхдээ ингэж маш зоригтой довтолж байж, оноо авах учиртай тул буруутгах аргагүй. Дахин нэг оноо алдсанаар эхний үед 22:25 ялагдлаа

Хоёрдугаар үед Арабын багийг барих дөхөөд алдчихаад байв. Саудын Араб үнэхээр нуруулаг, давуулалт сайтай баг байна. Ялангуяа довтолгооны хувилбар илүү олонтой. Энэ үеийн шийдвэрлэх хэсэг нь 9:13 ялагдаж байгаад дараалан зургаан оноо алдсанаар үндсэндээ үеийг алдах нь ойлгомжтой болсон.

Харин гуравдугаар үеийг манай залуус тун сайхан, урамтай эхлүүлсэн. 0:2 ялагдаж байгаад дөрвөн оноо дараалан авч, тэргүүлж эхэлсэн. Алтангэрэлийн хаалт, Батсуурийн довтолгоо гээд бүх юм амжилттай болж байлаа. Харин арабууд сандарч, юм л бол шүүгчтэй маргалддаг болж эхэллээ. 13:14 оноогоор Саудын Арабын баг нэг оноо дөхөж эхлэх үед манай баг завсарлага авсан. Харин энэ нь буруугаар нөлөөлж, завсарлаганы дараа арабууд тэргүүлж эхлэн, 25:21 ялалт авлаа.

Ийнхүү манай баг 1 ялалт 1 ялагдалтай тэмцээний хоёрдугаар байрт явж байна. Маргааш 17,30 цагаас Узбекистаны багтай тоглох юм.