М.УРАНЦЭЦЭГИЙН октагон дахь анхны тулааны тов тодорлоо

Ц.Энхтүвшин  Таван цагариг сонин

Монгол Улсын гавьяат тамирчин, Хөдөлмөрийн баатар, жүдо бөхийн Олимпын хүрэл медальт, дэлхийн аварга (алт, мөнгө, хошой хүрэл) Мөнхбатын Уранцэцэг маань жүдогийн дэвжээнээс "зодог тайлсан" ч холимог тулааны төрөлд хүч үзэхээр бэлтгэл сургуулилтаа АНУ-ын Нью Мексико мужийн Альбукерке хотноо байрладаг "Jackson Wick MMA Academy"-д хийж байгаа билээ.

Урнаагийн октагонд хийх анхны тулаан 2022 оны есдүгээр сарын 10-нд товлогдлоо.

Манай Урнаа PFC (Peak fighting championship) холбооны strawweight  буюу 48-52 кг-ийн жинд  amateur championship цол, бүсийн төлөө холимог тулааны туршлагатай тамирчин, Fury fighting championship холбооны atomweight буюу 48 кг хүртэлх жингийн аварга болж байсан АНУ-ын тамирчин Амбер Терреллтэй тулалдах бөгөөд PFC 23 тулааны үдэш Арканзас мужийн Жонсборо хотын Embassy suites зочид буудлын Red wolf convention center-т болох ажээ.