Чөлөөт бөх: Акари Фүжинами ДАШТ-д барилдахгүй

Японы чөлөөт бөхийн холбооноос энэ сарын 10-нд Сербид эхлэх чөлөөт бөхийн ДАШТ-д эмэгтэй 53 кг-ын жингийн чансааг тэргүүлэгч, дэлхийн аварга Акари Фүжинами гэмтлийн улмаас барилдахгүй боллоо гэж зарлалаа.

Энэ жил 18 настай Фүжинами наймдугаар сарын сүүлээр болсон шигшээ багийн цугларалтын эхний өдөр зүүн хөлөө гэмтээсэн гэнэ. Түүнийг шигшээ багт үлдээсэн ч барилдахаар бэртэл нь эдгэрээгүй тул хасахаас өөр арга байсангүй. Акари бүрэн эдгэрэхэд 56 хоног шаардлагатай гэж эмч нар оношилжээ.

Японы баг 53 кг-д өөр тамирчин барилдуулахгүй гэнэ.  

Ирэх 12 дугаар сард болох Бүх Японы АШТ-д Акари Фүжинами Токио олимпын аварга Маюү Мүкаидатай өрсөлдөх болно.

Акари Фүжинами өнгөрсөн жил Ослогийн ДАШТ-д түрүүлэхдээ нэг ч оноо алдалгүй, бүх өрсөлдөгчөө цэвэр ялсан. Тэрээр 2017 оноос хойш ялагдаагүй, 103 дараалан ялаад байгаа билээ.