Чөлөөт бөх: Ярыгиний тэмцээнд гадаадын бөхчүүд оролцож болно

Zindaa.mn сайтын спортын тоймч,  сэтгүүлч М.Сугар-Эрдэнэ Сербийн нийслэл Белград хотноо болж буй чөлөөт, сонгомол бөхийн Дэлхийн аварга шалгаруулах тэмцээн (ДАШТ)-ийг албан ёсны эрхтэйгээр сурвалжилж байна.

Дэлхийн бөхийн нэгдсэн холбооны тэргүүн Ненад Лалович Сербийн нийслэл Белград хотод хэвлэлийн бага хурал хийлгэж, орос тамирчдыг тэмцээн уралдаанд оролцуулахгүй байх шийдвэрээ үргэлжлүүлнэ гэдгээ мэдэгдлээ.

Тэрээр “Орос, Беларусын тамирчдыг тэмцээнд оролцуулах хүсэл бидэнд байна. Гэвч энэ нь манай холбоо дангаар шийддэг асуудал биш” гэж ярьсан юм.
 

Ирэх жилийн есдүгээр сард Красноярск хотод зохиогдох насанд хүрэгчдийн ДАШТ-ийг ОХУ-аас хураах талаар үг дуугарсангүй. Гэхдээ ОУОХ-ноос Оросын тамирчдыг тэмцээн уралдаанд туг далбаа, сүлд дуулалгүй оролцуулж болно гэсэн шийдвэр удахгүй гарах гэж байгаа гэнэ.

Тиймээс Дэлхийн бөхийн нэгдсэн холбооноос ирэх жил болох Красноярскийн Иван Ярыгиний нэрэмжит тэмцээнд гадаад улсын тамирчдыг оролцохыг зөвшөөрч, харин Оросын тамирчид ДБНХ-ны нэр дээр барилдаж болно гэсэн шийдвэр гаргахаар тохиролцоонд хүрчээ.