Донецк, Луганск, Херсон, Запорожье мужийн иргэд ОХУ-д НЭГДЭХИЙГ ДЭМЖЛЭЭ

Донецк, Луганск, Херсон, Запорожье мужид ОХУ-ын бүрэлдэхүүнд орох эсэх тухай санал хураалт явагдлаа.

Есдүгээр сарын 23-27-нд таван өдөр явагдсан бүх нийтийн санал асуулгын хуудсыг 100 хувь тоолж, үр дүнг нь танилцуулжээ. ОХУ-ын бүрэлдэхүүнд орохын төлөө Запорожье мужийн оршин суугчдын 93.11 хувь нь саналаа өгсөн бол Бүгд найрамдах Луганск ард улс гэж өөрийгөө тунхагласан Луганск мужийн оршин суугчдын 98.42 хувь нь, Донецк ард улс гэж өөрийгөө тунхагласан Донецкийн оршин суугчдын 99.23 хувь нь, Херсон мужийн иргэдийн 87.05 хувь нь Оросын бүрэлдэхүүнд орохын төлөө саналаа өгсөн байна.

Луганскийн Сонгуулийн ерөнхий хорооноос мэдэгдсэнээр Орост нээгдсэн санал хураах хэсгүүдийн ирцийг оруулаад нийт ирц 94.15 хувь болжээ. Санал хураалтад нийт 1 662 607 хүн оролцсон байна.

Запорожье мужид санал хураалтын ирц 85 хувьтай байсан бөгөөд 541 093 хүн санал асуулгад оролцсон бол Донецкт санал хураалтын ирц 97.51 хувь буюу 2 131 207 хүн санал асуулгад оролцсон байна.

Херсон мужид ирц 78.86 хувьтай буюу ОХУ-ын бүрэлдэхүүнд орох эсэх санал асуулгад 571 001 хүн оролцжээ.

Бүх нийтийн санал асуулгаар Донецк, Луганскийн оршин суугчид бүгд найрамдах улсаа ОХУ-ын бүрэлдэхүүнд орохыг дэмжиж байна уу гэсэн асуултад хариулсан бол Запорожье, Херсон мужийн оршин суугчид мужаа Украины бүрэлдэхүүнээс гарч, тусгаар улс байгуулан ОХУ-ын бүрэлдэхүүнд орохыг дэмжиж байгаа эсэхт хариулсан юм.

Херсон, Запорожье мужууд нь ОХУ тусгай ажиллагааны явцад Украины үндсэрхэг үзэлтнүүдээс чөлөөлсөн анхны мужуудын нэг билээ.