Э.Ариунболд: Наохиса Такатотой дахин барилдахыг хүсэж байна

Узбекистаны нийслэл Ташкент хотод болж байгаа жүдо бөхийн ДАШТ-ий эрэгтэй 60 кг-д мөнгөн медаль хүртсэн манай Э.Ариунболдоос Олон улсын жүдо бөхийн холбооны сэтгүүлч ярилцлага авчээ.

-ДАШТ-ий мөнгөн медаль хүртсэнд баяр хүргэе. Сэтгэгдлээ хуваалцаач.

-Анх удаагаа дэлхийн аваргад ороод финалд шалгарсандаа баш их баяртай байна.

-Финал хүртэл барилдахдаа өөртөө хэр итгэлтэй байв? Тэмцээний өмнө тавьсан зорилгоо биелүүлж чадсан уу?

-Өөртөө итгэлтэй барилдсан. Алтан медаль хүсэж, мөрөөдөж барилдаад чадаагүй ч мөрөөдөлдөө ойртлоо.
 

-Хагас шигшээ барилдааны үеэр ордон маш их шуугиантай байлаа. Сэтгэл зүйн хувьд ямар байв?

-Тиймээ, нутгийн бөхтэй барилдсан болохоор хүнд барилдаан болсон. Өрсөлдөгч дэмжлэг ихтэй байлаа. Ялчхаад хашхирч хамаг мэдрэмжээ гаргасан.

-Финалд Японы Наохиса Такатотой гар зөрүүллээ. Анх удаа ийм том дэвжээнд, том бөхтэй барилдсан сэтгэгдэл ямар байна?

-Аваргыг ялж, аварга болно гэж багш маань хэлж, татамид гаргасан болохоор ялна л гэж бодож барилдсан. Гэхдээ байдал өөр байлаа. Том аварга хүн өөр юм билээ. Түүнтэй дахин барилдахыг хүсэж байна.
 

-Дэлхийн аваргын медалиа хэрхэн тэмдэглэх гэж байна?

-Эхлээд багийнхантайгаа, дараа нь гэр бүлтэйгээ тэмдэглэнэ.