"Алтан охин" М.АНХЦЭЦЭГ АЗИЙН АВАРГА боллоо

Ц.Энхтүвшин, "Таван цагариг"

Бахрейны Манама хотноо болж буй хүндийг өргөлтийн Ази тивийн аварга шалгаруулах тэмцээнд манай туйванч охид үнэхээр бахдам амжилттай оролцлоо.

"Манама-2022" Азийн аваргад Гавьяат дасгалжуулагч Цэнхэржавын Хосбаярын удирдлага дор манай дөрвөн эмэгтэй туйванч хүчээ сорьж буй бөгөөд өнөөдрөөс өмнө дэвжээнд гарсан гурав маань гурвуулаа (59 кг-д Э.Энхтамир огцмоор мөнгө, 71 кг-д Г.Ануужин огцомд хүрэл, нийлбэрээр хүрэл, 76 кг-д О.Дархижав огцомд мөнгө) медаль хүртээд байсан билээ.

Монголын хүндийг өргөлтийн төдийгүй спортын түүхэнд олон олон "алтан үсгээр" бичигдсэн амжилтын эзэн, Дэлхийн аварга, ДАШТ-ий хошой мөнгө, хошой хүрэл медальт, Олимпийн 4 байрын шагналт, Оюутны болон залуучуудын дэлхийн аварга, Ази тивийн аварга, Азийн танхимын наадмын аварга, "Эрхэт Монгол" группийн тамирчин, "Алтан охин" хэмээн ард түмэндээ нэрлэгддэг, Монгол Улсын Гавьяат тамирчин Мөнхжанцангийн АНХЦЭЦЭГ маань өнөөдөр -87 кг-ийн жинд дэвжээнд гарлаа.

Огцом өргөлтөд Анхаа эхлээд 105 кг-ыг, түлхэлттэйд 135 кг-аар захиалгаа өгсөн. Энэ жингийн хамгийн өндөр захиалга.

Огцомд Ц.Хосбаяр дасгалжуулагч тэмцээний явц, бусад өргөгчдийн амжилтыг харан, эхний захиалгаа өөрчилж, 111 кг болгоод эхний оролтоор л Анхаа амжилттай өргөлөө.

Хоёр дахь оролтоо 114 кг -аар захиалаад бас өргөж, огцомд алтан медаль авах нь тодорхой болсон.

Түлхэлттэй өргөлтөөр М.Анхцэцэг  эхний оролтоо гүйцэтгэж чадсангүй. Хоёр дахь оролтоороо харин 135 кг-аа хөнгөхөн авлаа. Ингээд түлхэлттэйд мөн алтан медаль, нийлбэрээр алтан медаль авч, Ази тивийн аварга цолыг дахин хүртлээ.

Анхаа маань аргагүй л Дэлхийн аварга хүн шиг Азидаа бол ааглаж, бааварлаж байна даа. Захиалгаа өгч буй, өргөлтөө гүйцэтгэж буйгаас андашгүй.

Ийнхүү манай дөрвөн тамирчин дөрвүүлээ медальтай (3 алт, 2 мөнгө, 2 хүрэл) Азийн аваргыг өндөрлүүлж, Алтан соёмбот далбаагаа мандуулж, Төрийн дууллаа Бахрейнд эгшиглүүллээ.

Ирэх 12 дугаар сард Колумбид болох Дэлхийн аварга шалгаруулах тэмцээнд амжилтаа бататгахыг ерөөе!