Жамболат Тедеев: Мамиашвили намайг зайлууллаа

ОХУ-ын Спорт бөхийн холбооны Гүйцэтгэх зөвлөлийн хуралдаан болж, Үндэсний шигшээ багийн ахлах дасгалжуулагч Жамболат Тедеевийг ажлаас нь чөлөөлж, шигшээ багийн куратор хэмээх албанд томилсноо зарласан билээ.

Харин Тедеев энэ шийдвэрийг хүлээн зөвшөөрөхгүй байгаагаа илэрхийлж, ил захидал бичжээ.

Захидалд “Хүндэт найз нөхөд, хамтран ажиллаж байсан андууд, бөх сонирхогч та бүхэнд хандаж байна.

Намайг шигшээ багийн ахлах дасгалжуулагчийн албанаас халсан талаар бүх үнэнийг хэлэх цаг иржээ. Тиймээ, өөр албанд томилсон биш халсан талаар ярих гэж байна. Куратор гэдэг албан тушаал манай бөхийн холбоонд угаасаа байсан тушаал бөгөөд хоёр жилийн өмнө Бөхийн холбооны чуулганаар олимпын хошой аварга, Спорт бөхийн холбооны дэд ерөнхийлөгч Арсен Фадзаевыг сонгож байсан юм. Манай бөхчүүдэд хууль ёсоор сонгогдсон куратор байсаар байхад юун бас нэг куратор вэ?

Шигшээ багтай байгуулсан миний гэрээг сунгахгүй шийдвэрийг холбооны тэргүүн Михаил Мамиашвили дангаараа есдүгээр сарын 30-нд гаргасан. Гүйцэтгэх зөвлөлийн бодол санаа огт хамаагүй байсан. Миний 20 жил удирдсан шигшээ багийн амжилт, үр дүнд хэн нэгэнд эргэлзээ байгаа юу? Ямар ч эргэлзээ байхгүй гэж бодож байна. 2001 онд намайг ахлах дасгалжуулагч болж байхад манай чөлөөт бөхөд цаг үе хэцүү байсныг бүгд мэднэ. Бид, манай дасгалжуулагч нар шигшээ багаа өдөр, сар, жил зарцуулан бүрдүүлсэн билээ. Одоо манай шигшээ дэлхийн хамгийн хүчирхэг, хамгийн залуу баг. Үүнийг бид өнгөрсөн жил олимп, ДАШТ-д дахин нотлон харуулсан билээ. Миний 200 гаруй шавь дэлхийн хамгийн том тэмцээнүүдийн алтан медальтай.

Нэг жилийн өмнө 2021 оны аравдугаар сарын 19-нд Спорт бөхийн холбооны Гүйцэтгэх зөвлөлийн хуралдаан дээр, дараа нь Спортын яамны шинжээчдийн зөвлөлийн хурлаар миний ажлыг хамгийн өндөр оноогоор үнэлсэн. Ерөнхийлөгч В.Путин ч миний хөдөлмөрийг үнэлж, Александр Невскийн одон, хүндэт жуух бичгээр шагнаж байлаа. Энэ жилийн хоёрдугаар сарын 24-нд Украинд эхэлсэн цэргийн тусгай ажиллагааг спорт холбоод дундаас манай чөлөөт бөхийн шигшээ баг хамгийн анх, цор ганцаараа дэмжиж байсныг онцлон тэмдэглэмээр байна. Үүний улмаас би Навальный гаргасан хоригийн жагсаалтад орсон билээ.

Шигшээ багийн ахлах дасгалжуулагчийн албанд хийсэн миний бүх ажил ил тод, нээлттэй. Бидний хүрсэн гайхамшигтай амжилт, үр дүн үүнийг харуулж байгаа юм. Миний гэрээг сунгахгүй шийдвэр гаргахдаа холбооны ерөнхийлөгч Мамиашвили эрүүл ухаанаар шийдээгүй, хувийн бодлоо улс орон, тамирчдын эрх ашгаас дээгүүр тавьжээ. Оросын спортын түүхэнд шигшээ багаа хамгийн өндөр амжилтад тогтмол хүргэдэг дасгалжуулагчаа халсан анхны тохиолдол энэ боллоо.     

Эцэст нь би хаана ч байсан, хаана ч очсон агуу их эх орондоо үнэнч хэвээр үлдэнэ гэдгээ мэдэгдэж байна” гэжээ.