Asia CUP: Монголын шигшээ 2 дахь ялалтаа авлаа

Монгол улсын нийслэл Улаанбаатар хотноо Азийн аваргын урьдчилсан шатны “D” хэсгийн тоглолтууд явагдаж байна. Өчигдөр буюу тэмцээний 3 дахь өдөр Вьетнам болон Тайланд улсын багууд эхний тоглолтыг хийлээ. Харин дараа нь түүний талбайн эзэн Монголын баг Тайти улсын багийн эсрэг тоглолоо.

Тайландын баг хожигдолгүй цувралаа үргэлжлүүллээ

Азийн аваргын урьдчилсан шатны “D” хэсгийн долоо дахь тоглолтыг Тайланд болон Вьетнам улсын багууд хийлээ. Тоглолтын эхнээс Тайландын баг илүүрхэж чадсанаар 81-55 харьцаатай ялалт авлаа.  Тайландын багийн хувьд довтолгооны бүх үзүүлэлтээр эсрэг багаасаа илүү тоглосон төдийгүй эсрэг багаа ердөө 29 хувьтай довтлуулжээ. Өнөөдрийн тоглолтын шилдгээр 23 оноо, 5 самбар авсан Фредерик Ли Жонес Лиш  тодорлоо. Харин эсрэг багаас Жастин Янг 13 оноо, 9 самбар авч баг тэргүүллээ. Ингэснээр Тайландын баг гурван хожилтой болсон бол Вьетнамын баг нэг хожил нэг хожигдолтой боллоо.

Монголын баг хоёр дахь ялалтаа авлаа

Азийн аваргын урьдчилсан шатны “D” хэсгийн найм дахь тоглолтыг Монгол болон Тайти улсын багууд хийлээ.

Ордон дүүрэн үзэгчдийнхээ өмнө тоглож буй манай шигшээ баг тоглолтын эхнээс илүүрхэж явсаар 91-62 харьцаатай ялалт авлаа. 

Манай баг үлдсэн чухал тоглолтуудын өмнө үндсэн бүрэлдэхүүнээ амраасан. Энэ тоглолтын шилдгээр 18 оноо, 3 самбар, 4 дамжуулалт өгсөн М.Өлзий-Орших  тодорсон бол Б.Билгүүн, Т.Санчир, А.Ананд нар 10-с дээш оноо авч багаараа жигд тоглолоо..

Харин эсрэг багаас М.Руфина 14 оноо, 8 самбараар баг тэргүүллээ Ингэснээр Манай баг хоёр хожилтой болсон бол Тайти улсын баг гурван хожигдолтой боллоо.