Катар-2022: Н хэсгээс хэн нь шалгарах вэ?

Катар-2022 дэлхийн аваргын тэмцээний хэсгийн тоглолтууд өндөрлөж байна. Шийдвэрлэх гуравдугаар тойргийн тоглолтууд зэрэг явагдах бөгөөд 1/8 финалд өрсөлдөх багууд тодорно.

Хэрэв хоёр болон гурван баг оноо тэнцвэл:

1. Гоолын зөрүү.

2. Гоолын тоо.

3. Баг хоорондын тоглолтын дүн (оноо, бөмбөгний зөрүү, гоолын тоо).

4. Фэйр-плей буюу улаан, шар хуудас.

Энэ хэсгээс Португалын баг 6 оноотой, эхний байрт явж байгаа. Роналдугийн баг Уругвайг юм хийлгэлгүй ялж, хасагдах шатанд шалгарсан. БНСУ, Уругвайн шигшээ тэднийг гүйцэх боломжгүй болсон ч Португал хэсгийн нэгдүгээр байрт орсон гэсэн үг биш. Ганагийн баг 3 оноотой, үлдсэн хоёр баг тус бүр нэг оноотой. Жишээ нь, сүүлийн тойрогт Португал Өмнөд Солонгост 0:1 ялагдаж, Гана Уругвайг хоёр гоолын зөрүүтэй ялахад Гана нэгээр гарах юм. Ер нь бол Португал ялагдахгүй байхад л нэгдүгээр байр ороод ирнэ. Гана Уругвайг ялахад  1/8 финалд гарна. Ялагдвал шалгарахгүй гэртээ харина. Гана тэнцсэн тохиолдолд Өмнөд Солонгос Португалыг хоёр бөмбөгний зөрүүтэй ялахгүй байхад тэд цаашаа шалгарах юм. Харин солонгосчууд тун хэцүү байдалд орсон. Тэд ямар ч байсан Португалыг ялах ёстой, дээр нь Гана Уругвайд ялагдаасай гэж хүсэхээс өөр арга байхгүй. Энэ хоёр нөхцөл биелсэн ч бөмбөгний зөрүү тоолох юм.

3-р тойрог

12-р сарын 2

23:00. БНСУ — Португал.

23:00. Гана — Уругвай.