Хакүхогийн зодог тайлах ёслолын шинэ цүна

Вандан Даваа, Токио хот

Өнөөдөр буюу 12 сарын 24-ний өдөр Токиогийн Сүмида дүүрэг дэх Миягино дэвжээнд Мягино ояката Хакүхо М.Даваажаргал аваргын цүна ба бүслүүр товнов.

Ёкозүнагийн бүслүүр ба цүнаг жил 3 удаа Токиод зохиогддог башёогийн өмнө шинэчилж хийдэг заншилтай ба Миягино ояката Хакүхо зодог тайлахын өмнө ба 2021 оны 5 сард хамгийн сүүлд цүнагаа шинэчилж хийсэн болно.

Миягино ояката Хакүхо М.Даваажаргал хэвлэлийнхэнд ярихдаа “Жил хагас гаран цүна товносонгүй, энэ цүна миний хувьд сүмочийн гэзэгтэй байхдаа хийсэн хамгийн сүүлийнх нь. Гэвч төгсгөл бүр шинэ зүйлийн гараа гэдэг миний хувьд ч ялгаагүй шинэ гараа ба гэзэг үсээ тайрах нь хаяанд иржээ гэдгийг өнөөдөр биеэрээ мэдэрсэн нэг өдөртэй боллоо. Жил хагас гаруй ёкозүнагийн цүна зүүж, дохёон ёслол үйлдсэнгүй, зодог тайлснаасаа хойш өнөөдөр анх удаа цүнагаа бүсэлж байна.

Дэвжээнийхээ дохёонд шинэ хийсэн цүнагаа бүслээд дохёон ёслолын дасгал хийлээ. Энэ үед 22 настайдаа шинэ ёкозүна болсон тэр үеэ эргэн нэг саналаа” гэж хөөрлөө.

Энэхүү цүна бүслүүрийг ирэх оны 1 дүгээр сарын 28-нд болох Зодог тайлах ёслолын үйл ажиллагаанд хэрэглэх юм.