ОУОХ: Дайныг дэмжээгүй орос тамирчдыг оролцуулах талаар ярьж эхэллээ

ОУОХ-нд ОХУ-ын тамирчдыг олон улсын тэмцээн, тэр дундаа олимпын наадамд оролцуулах талаар ярьж эхэллээ. Гэхдээ мэдээж маш хатуу шалгуур хангасан тамирчдыг л оруулах бололтой.

Юуны өмнө ОУОХ-ны мэдэгдлийг авч үзье.

Өнгөрсөн 12 дугаар сарын дундуур ОУОХ-ын чуулганаар орос тамирчдыг Ази тивийн тэмцээн уралдаанд оруулах талаар хэлэлцсэн. Азийн олимпын зөвлөл ч оросуудыг хүлээн авахад бэлэн гэдгээ мэдэгдсэн юм. Энэ нь орос тамирчдад Парис-2024 олимпын наадмын эрхийн тэмцээнүүдэд оролцох боломж олгох гол зорилготой байлаа. Энэ саналыг ОУОХ-ноос спорт холбоодтой ярилцаж шийднэ гэж байсан. Тэгвэл ярилцаж хэлэлцээд ийм шийдвэр гарсан байна.

1. Олимпын хөдөлгөөний улс орнуудыг нэгтгэх үүргийг дайн хямралтай энэ цаг үед хатуу баримтлах ёстой.

2. Олимпын хартийн дагуу бүх тамирчдын эрхийг хүндэтгэн үзэх. Засгийн газраас ямар тамирчныг тэмцээнд оруулах, үгүйг шийдэж болохгүй.

3. Аль улсын иргэн гэдгээр нь нэг ч тамирчны тэмцээнд орох эрхийг хасаж болохгүй.

Ингээд ОУОХ-ноос орос, беларусь тамирчдыг олон улсын тэмцээнд орууллаа гэхэд хатуу шалгуур тавихаар болжээ. Үүнд:

а) Тус хоёр улсын тамирчид улс орноо төлөөлөх эрхгүй.

б) Олимпын хартийг бүрэн дагаж байгаа тамирчныг л оролцуулна. Энэ нь ОУОХ-ны энхийг сахиулах үйл ажиллагааны эсрэг хандаагүй, Украин дахь дайныг идэвхтэй дэмжээгүй тамирчид гэсэн үг юм. Мөн Дэлхийн допингийн эсрэг дүрэм журмыг ёсчлон дагадаг, даган мөрддөг тамирчид гэж заажээ. Тамирчдыг дээрх хоёр шаардлагад нийцэж байгаа эсэхийг нэг бүрчлэн сайтар шалгах юм.