Сүмо: Дээд зиндааныхныг ялдаг монгол “шинэ цэрэг”

Мэргэжлийн сүмогийн Исэгахама дэвжээнд дадлага хийж байгаа монгол бөх Б.Очирсайхан өчигдрийн бэлтгэл дээр Наран орны сэтгүүлчдийг гайхуулжээ.

Эхлээд тэр макүшита зиндааны бөхчүүдтэй барилдаж, Мичинокү дэвжээний Дайничидог 15 ялж, нэг унан, Юүкитэй 15 барилдахдаа нэг ч өвдөг шороодсонгүй.

Ингээд цолтой бөхчүүдийн бэлтгэлд оролцож, жюүрёогийн Атамифүжитэй 5 ялалт, 4 ялагдал, дээд зиндааны Мидорифүжид 3 унаж, нэг ялан мэргэжилд сайн барилдаж чадна гэдгээ харууллаа. Сэтгүүлчдийг гайхуулсан зүйл нь комүсүби Кирибаяматай хийсэн барилдаан байлаа. Дараагийн озэки гэгдэж байгаа нутгийнхаа ахтай гурав барилдахдаа бүгдэд нь ялсан байна. Хэчнээн бэлтгэлийн барилдаан ч гэсэн мэргэжлийн сүмод ороогүй байгаа залуу гурван цолтой бөхтэй 16 барилдахдаа 9 ялж, 7 унан, 50 хувийн амжилт үзүүлж чадлаа.  

Б.Очирсайхан 20 настай, 190 см өндөр. 2018 онд Японд ирж, Канагава мужийн Асахигаока ахлах сургуульд элссэн. Асахигаока сургуульд түүнээс хоёр ангиар дээр дараа нь оюутны ёкозүна болсон Б.Чойжилсүрэн, Далайбаатар, нэг ангид Мөнхжаргал зэрэг монгол хүчтэй сайн бөх олон байсан тул ахлах сургуульдаа олон тэмцээн уралдаанд орж чадаагүй гэнэ. Канагава мужийн шигшээд багтан, Бүх Японы аварга шалгаруулах тэмцээнд орж, багаараа шөвгийн наймд шалгарч байсан. 2021 онд ахлах сургуулиа төгсөөд Исэгахама дэвжээнд дадлага хийж, мэргэжилд орохоор бэлтгэж эхэлжээ. 2020 оны Токио олимпын бамбарын буухианд Канагава мужийг төлөөлөн оролцсон.

Хэзээ мэргэжилд барилдаж эхлэх нь тодорхойгүй байгаа ч Б.Очирсайхан одооноос шинжээчдийн анхаарлыг татаад байна.

Ёкозүна Тэрүнофүжи 2011 онд жониданд Вакамишёо нэртэй байхдаа бэлтгэл дээр барилдаад макүшитагийн бөхчүүдэд унаагүй тул дээд зиндааны Дайдо хашраахаар гарч ирээд дөрөв дараалан унаж байсан түүхтэй. Тэр үед Таканохана ояката Г.Ган-Эрдэнийг ирээдүйн од хэмээн үнэлж байлаа.