Вилли Саньоль: Эхний үед манай баг маш удаан тоглолоо

Монголын Үндэсний шигшээ баг ОУХБХ-ны шигшээ багуудын тоглолтын өдрүүдээр Гүрж улсын шигшээ багтай нөхөрсөг тоглолт хийж, 1:6 ялагдлаа.

Гүрж – Монгол 6:1 (1:1, 5:0)

3-р сарын 25, 22.00, Batumi Arena

Гоол: 1:0 – 15 Волков, 1:1 – 31 Б.Балжинням, 2:1 – 56 Чакветадзе, 3:1 – 58 Чакветадзе, 4:1 – 70 Лобжанидзе, 5:1 – 88 Беридзе, 6:1 – 90 Зивзивадзе.

Гүржийн хөлбөмбөгийн шигшээ багийн дасгалжуулагч, франц мэргэжилтэн Вилли Саньоль тоглолтын дараах хэвлэлийн хурал дээр Монголтой хийсэн тоглолтыг ийнхүү дүгнэжээ.
 

Вилли Саньоль “Ямар нэг дүгнэлт хийхэд хэцүү байна. Би шигшээ багт цөөхөн тоглосон тоглогчдоо ашиглах шийдвэр гаргасан. Тийм болохоор чанар муудсан. 20 настай Лука Гагнидзе, 23 настай Лука Гугешашвили, 17 настай Габриэль Сигуа нар анх удаа шигшээд тоглолоо. Шинэчүүд маань хамтдаа тоглож байгаагүй болохоор ойлголцол дутагдалтай байлаа. Би эхний үеийн тоглолтод сэтгэл хангалуун бус байна. Бид маш удаан тоглосон. Хоёрдугаар үед хурд нэмэгдсэнээр гоол оруулах боломж олон гарлаа. Бид олон боломж гаргасан, олон ч гоол хийлээ. Энэ улирлын анхны тоглолт гэхэд өөдрөг үр дүн гэж харж байгаа. Эхний үеийн дараа би Георгий Чакветадзед талбайн төвд илүү тогло гэж хэлсэн. Эхний үед тэр зүүн жигүүрт гүйж байсан. Хаалгач Гиорги Лориа Монголын тамирчинтай мөргөлдөөд гэмтсэн тул бид төлөвлөөгүй сэлгээ хийхээс өөр аргагүйд хүрсэн. Гугешашвили даалгавраа амжилттай гүйцэтгэсэн. Хоёр хоногийн дараа биднийг Норвегитой хийх хүнд тоглолт хүлээж байна. Өнөөдрөөс илүү сайн тоглож байж бид Норвегийг ялах болно” гэжээ.