Гүржид өрсөлдсөн Монголын багийг халимагууд дэмжжээ

Гүржийн Батуми хотод болсон Монгол, Гүржийн тоглолтыг Premier Sport суваг шууд дамжуулан үзүүлсэн билээ.

Гүржийн фэнүүд цэнгэлдэх дүүрэн байхад Монголын далбаатай хэдхэн хүн манай багийг дэмжиж байгаа харагдсан. Хэдий манай баг 1:6 ялагдсан ч тэд хоолой мэдэн хашхирч байлаа.

Тэдгээр хүмүүс бол манай халимаг ахан дүүс байжээ. Тоглолт үзэхээр Батумид ирсэн халимаг залуу Басан Захаров Telegram сувагтаа “Өчигдөр Батумид Гүрж, Монголын хөлбөмбөгийн шигшээ багийн нөхөрсөг тоглолт боллоо. Бид жинхэнэ фэнийн хувиар багаа дэмжихээр цэнгэлдэхэд очсон. Дэлхий, Европын зэрэглэлийн мэргэжлийн тоглогчидтой Гүржийг ялах тун хэцүү нь ойлгомжтой байсан. Монголд эрс тэс уур амьсгалтайн улмаас хөлбөмбөг сайн хөгжөөгүй. Гэхдээ монголчууд арслан мэт үзэлцэж, эхний үе 1:1 харьцаатай тэнцсэн. Монголчууд гоол оруулах боломжоо 100 хувь ашиглаж чадсан юм. Манай баг гоол хийхэд биднийг яасан гэж бодож байна. Эргэн тойронд байсан гүржүүд “Урагшаа” гэдэг монгол үгийг бараг цээжилсэн гээд бод. Гүржийн багийн пенальтиг манай хаалгач хаахад бид бараг дэлбэрэх шахсан. Харамсалтай нь хоёрдугаар үед таван бөмбөг дараалан алдсан. Хамгийн гол зүйл тоглолтын дараа болсон. Монголын шигшээ багийнхан бидний сууж байсан индрийн өмнө ирж, талархсанаа илэрхийлсэн. Хажууд байсан Гүржийн балиашгууд биднээс дутахгүй баярлаж, бид нартай хамт зураг авхуулсан. Нэг хэсэг од болсон мэт мэдрэх ч сайхан байсан шүү” гэж бичжээ.