Мария СТАДНИК: Сүсаки? Би япон бөхчүүдийн талаар боддоггүй

Азербайжаны эмэгтэй чөлөөт бөхийн шигшээ багийн лидер Мария Стадник (50 кг) сэтгүүлчдийн асуултад хариуллаа.
 

-Удахгүй Европын АШТ эхлэх гэж байна. Ээлжит алтан медалиа авахаар бэлтгэлээ хийж байна уу?

-Би Европт найман удаа түрүүлсэн. Ес дэх тивийн аваргын тэмцээнээ олимпын эрх олгох ДАШТ-ий бэлтгэлийн нэг шат гэж харж байна. Хэр бэлтгэлтэй байгаагаа мэдэхийн тулд мэдээж алтан медаль авах нь чухал.

-Сүүлийн үед та хоёр тэмцээнд оролцлоо. Хэр формтой байна вэ?

-Формдоо дөнгөж орж байна. Удаан барилдаагүй болохоор хуучин формдоо ороход хугацаа хэрэгтэй.

-Симеон Штерев эмэгтэй шигшээ багийг дахин удирдах болсныг та хэрхэн харж байна вэ? Сүүлийн жилүүдэд дасгалжуулагчийн асуудал хурц тавигдсан.

-Штеревийг миний санаачилгаар урьсан юм. Тэр бол миний хувийн дасгалжуулагч. Жинхэнэ шилдэг мэргэжилтэн. Түүнтэй хамт би тав дахь олимпдоо оролцож чадна гэж бодож байна.

-Европын АШТ бол Парисын олимп хүртэлх урт замын эхлэл нь. Та Парисын олимпын талаар боддог уу?

-Үнэнийг хэлэхэд би одоо олимпын талаар бодохгүй байгаа.

-Танаас Японы өрсөлдөгчдийн талаар их асуудаг. Одоо таны жинд Юи Сүсаки тэргүүлж байна. Гол өрсөлдөгчийнхөө талаар юу бодож байна?

-Би япон бөхчүүдийн талаар огт боддоггүй. Бодох өөр зүйл надад бий.

-Сүүлийн жилүүдэд эмэгтэй багийн бүх том амжилт тантай л холбоотой боллоо.

-Манай шигшээд залуу тамирчид бий ч насанд хүрэгчдийн бөхийн хэмжээнд хүрэхийн тулд их ажиллах шаардлагатай. Шигшээ баг одоо болтол 34 настай ахмад тамирчинд л найдаж байхаар өөр хэлэх үг алга даа. Харамсалтай нь, манайд өөрийнхөө тамирчдад итгэхгүй байна.Охид зөвлөгөө авахаар ирэхэд би мэддэг бүхнээ зааж өгдөг.