Чөлөөт бөх: П.Орхон мөнгөн медальтай ААШТ-ээ өндөрлүүллээ

Гэрэл зургийг Д.Нямбилэг

Дөрөвдүгээр сарын 9-14-нд Казахстаны Астана хотод чөлөөт бөх, сонгомол барилдааны Азийн аварга шалгаруулах тэмцээн болж байна.

Өчигдөр эмэгтэйчүүдийн барилдаан эхэлж, манай баг нэг мөнгөн медаль хүртсэн. Өнөөдөр эмэгтэй 53, 57, 62, 65, 72 кг-ын жингийн барилдаанууд явагдаж байна.

Эмэгтэйчүүдийн 62 кг-ын жинд дэлхийн тавцанд эргэн ирсэн Пүрэвдоржийн Орхон зодоглов.

Эхний өрсөлдөгч нь Энэтхэгийн Сонам Сонам. Энэтхэг бөх торгуулийн нэг оноогоор тэргүүлж байсан ч хоёрдугаар үеэс манай бөх оноо авсаар 7:1 ялж байх үедээ далаар нь цэвэр тавьж, эхний ялалтаа авсан. Хагас шигшээд Хятадын Xiaojuan LUO-тэй барилдаж, эхний үед 0:3 ялагдаж байгаад 7:3 оноогоор ялж чадсан. 
 

Финалд алтан медалийн төлөө П.Орхон Киргизийн Айсулуу Тыныбековатай барилдлаа. Киргизийн агуу гурвал гэгддэг эмэгтэй гурван бөхийн лидер нь.

Барилдаан тун сонирхолтой өрнөсөн. Барьц булаалдан, ихэд хашир үзсэн. Эхний оноо торгуулийн 30 секундээр киргиз бүсгүйн талд орсон. Удалгүй хөлд ороход нь эргүүлж, хоёр оноо авсан ч ардаа алдаад мөн 2 оноо алдлаа. П.Орхон өөрөө явалгүй, хариу мэх хийсээр оноог тэнцүүлж чадсан ч киргиз бөх илүү идэвх санаачилгатай, хурдтай байлаа.

Цаг дуусах дөхөж байх үед оноогоо 5:9 болгон ойртуулсан ч нэмж оноо авах цаг үлдээгүй байлаа.

Ийнхүү П.Орхон Азийн АШТ-ий ээлчит мөнгөн медалиа хүртлээ. Түүний тивийн аваргын 3 дахь медаль.