Чөлөөт бөх: Орос бөхчүүд Европын АШТ-д оролцохгүй

ОУОХ-ноос тодорхой нөхцөл, болзол хангасан ОХУ, Беларусын тамирчдыг олон улсын тэмцээнд оролцохыг зөвшөөрсөн билээ. Энэхүү нөхцөлд ЦСКА, Динамо зэрэг хүчний байгууллагын клубийн тамирчид, Украинд дахь цэргийн ажиллагааг дэмжсэн тамирчдыг оролцуулахгүй гэж заасан байгаа юм. Дэлхийн бөхийн нэгдсэн холбооноос энэхүү шаардлагыг зөөллөх хүсэлтийг ОУОХ-нд тавиад байгаа юм. Учир нь Оросын чөлөөт бөхийн шигшээ багийн 90 хувь нь хүчний байгууллагад харьяалагддаг тамирчид байгаа.

ОХУ-ын Спорт бөхийн холбооны ерөнхийлөгч Михаил Мамиашвили энэхүү болзлыг хүлээн зөвшөөрөхөд хэцүү байгаа тул ОХУ-ын шигшээ баг маргааш Хорватад эхлэх Европын аваргын тэмцээнд оролцохгүй гэж мэдэгдлээ.

-Тивийн аваргын тэмцээнд оролцох уу?

-Оролцохгүй.

-Есдүгээр сард Сербид болох ДАШТ-д оролцох уу?

-Есдүгээр сараас өмнө ямар тамирчдыг оролцуулах талаар нэгдсэн шийдвэр гарсан байх болов уу гэж найдаж байна. ДАШТ-д Парисын олимпын эрхийн үндсэн өрсөлдөөн болох тул заавал оролцоно гэж бодож байгаа. ОУОХ-ны шаардлагад хүний эрхийг зөрчсөн, доромжлон гутаасан заалтууд байна. Спорт улс төрөөс тусдаа байх ёстой. Тамирчид ижил нөхцөлд өрсөлдөх боломжтой байх ёстой. Харин одоо ОУОХ тамирчин болгоныг улстөрч болгохоор ажиллаж байна. Тамирчдад маш их дарамт ирж байгааг хэлэх нь зүйтэй.

Чөлөөт бөхийн Европын АШТ дөрөвдүгээр сарын 17-23-нд Загреб хотод, ДАШТ есдүгээр сарын 17-23-нд Сербид явагдах юм.