Абасгаджи Магомедов: 2 сая рубль өгвөл Угуевтай барилдаж болох юм

Чөлөөт бөхийн дэлхий, Европын аварга Абасгаджи Магомедов саяхан Алматыд (Казахстан) болсон мэргэжлийн Поддубный лигийн тэмцээнд 61 кг-д Киргизийн  Тайирбек Жумашбекийг цэвэр дарсан билээ. Тэрээр тэмцээний дараа сэтгүүлчдийн асуултад хариуллаа.

-Цэвэр ялалт.

-Тайирбек техник сайтай бөх ч би маш сайн бэлтгэсэн байсан. Түүнийг ордон тэр бигээрээ дэмжинэ гэж би мэдэж байсан болохоор өрсөлдөгчөөсөө гадна үзэгчидтэй барилдлаа. PWL-4 сайхан тэмцээн, барилдахад таатай байдаг. Дараагийн тэмцээнүүдэд ч гэсэн урилга ирвэл дуртайяа оролцох болно.

-Хэнтэй барилдмаар байна?

-Японы Рэй Хигүчи, Арменийн Арсен Арутюнян. Өнөөдрийн байдлаар энэ хоёр бөх дэлхийн шилдэг нь байгаа. Би тэдэнтэй гар зөрүүлж ялаад, өөрийгөө илүү хүчтэй гэдгийг харуулмаар байна.

-Энэ удаагийн тэмцээнд таны өрсөлдөгчийг сонгох гэж байхад Угуевын нэр их сонсогдож байсан.

-Заур Угуев бид хоёр энэ талаар ярилцсан. Хэн хэнд нь тус бүр 2 сая рубль (25 мянган ам.доллар) өгөөд, дээр нь ялагч 1 сая рубль авах болбол барилдахад бэлэн байна. Хэрэв мэргэжлийн лиг тийм шагналын мөнгө гаргахад бэлэн байгаа бол бид урилгыг хүлээж байгаа шүү.

-Хигүчи, Угуев хоёрын хэнтэй барилдахад илүү сонирхолтой вэ?

-Угуев. Тэр бол олимпын аварга хүн. Барилдахад сонирхолтой, хэцүү байх болно.

-65 кг-ын жинд шилжих бодол байгаа юу?

-Одоохондоо байхгүй. Олон улсын тавцанд ямар шинэ мэдээ гарах бол гээд хүлээж байна. Миний жин бага хэвээр байгаа. Бэлтгэл дээр 65 кг-ынхантай барилдахаар жин дутуу байгаагаа мэдэрдэг.

-Ойрын төлөвлөгөө?

-Алиевийн нэрэмжит тэмцээн, Оросын УАШТ гэсэн хоёр тэмцээнд оролцоно. Энэ жилийн улсын аварга манай хотод болох тул сайн бэлтгэх хэрэгтэй.

-Гэр бүлийн амьдралын талаар?

-Нэмэлт үүрэг хариуцлагатай болдог болохоор барилдахад нэмэр болдог. Ганц бие бөхчүүддээ хурдан гэрлээрэй гэж зөвлөж байна.