Ичиножёо хэвлэлийн бага хурал хийлгэлээ

Мэргэжлийн сүмогийн Минато дэвжээний маэгашира Ичиножёо өнөөдөр гэнэт зодог тайлж, бөх сонирхогчдын гайхлыг төрүүлэв.

Ичиножёо Кокүгикан ордонд хэвлэлийн бага хурал хийлгэж, зодог тайлсан шалтгаанаа ярилаа.

Тэрээр “Нурууны архаг гэмтэл эдгэрэхгүй байна. Мэс засал хийлгэсэн ч сайжрахгүй байгаа тул оякататай нэлээд өмнөөс ярьсан. Ингээд хоёр хоногийн өмнө зодог тайлахаар шийдсэн. Дахиад барилдмаар байсан ч бие үнэхээр дийлэхгүй нь. Зүгээр алхахад ч, хажуулдахад ч маш их өвддөг. Багадаа телевизээр сүмо бөх үзээд сүмоч болохоор шийдсэн. Дээд зиндаанд анх дэвшиж байхдаа хамгийн их баярласан. Хамгийн дурсгалтай нь дээд зиндаанд түрүүлж, Эзэн хааны цом өргөсөн явдал. Цаашдаа юу хийхээ одоогоор бодоогүй байна. Ояката болох талаар огт бодож байгаагүй” гэж тайлбарлалаа.  

Ичиножёо дээд зиндаанд нэг удаа түрүүлсэн. Хамгийн дээд цол нь сэкивакэ. 9 кинбоши шагналтай. 2021 онд Японы иргэншил авсан.