Видео: Хоккейн ДАШТ-ий Шилдэг найман баг тодорлоо

Өчигдөр хоккейн ДАШТ-ий хэсгийн сүүлийн тоглолтууд явагдаж, плей-оффд өрсөлдөх багуудын нэрс тодорлоо.

Герман – Франц 5 : 0

Гурав дараалсан ялагдлаар тэмцээнээ эхлүүлсэн германууд дөрөв дараалан ялж, хасагдах шатанд шалгарлаа. Хоёрдугаар үеийн эхэнд л 3:0 тэргүүлсэн тэд сандарч тэвдэлгүй Францыг бут ниргэсэн. Хаалгач Матиас Нидербергер шат-аут толилуулав.

Словак – Норвег 4 : 1

Хоккейн эх орон Канадыг буулган авсан Норвегийн баг нутагтаа харих болсон.

Швед – АНУ 3 : 4 ОТ

Ялагдлын гашууныг амсаагүй явсан хоёр баг хэсэгтээ түрүүлэхийн төлөө халз үзэлцлээ. Шведийн шинэ од Лео Карлссон тооны харьцааг нээсэн ч америкчууд дараалан гурван гоол оруулж, илүүрхэж эхэлсэн. АНУ итгэл төгс ялах нь гэж байтал шведүүд тоог тэнцүүлсэн. Гэхдээ овертаймд америкчууд ялалтаа авсан. Тэд түүхэндээ анх удаа ДАШТ-ий хэсгийн тоглолтоо ялагдалгүй давж байгаа юм.

Канад – Чех 3 : 1

Хоёр тоглолт дараалан ялагдсан канадчууд ямар ч гэсэн Чехийг ялж, нэр төрөө хадгалан үлдсэн.

Финланд – Дани 7 : 1

Финландын баг эхний үед руван гоол оруулж, тоглолтын хувь заяаг шийдсэн.

Швейцар – Латви 3 : 4 ОТ

Тоглолт бүрээ үндсэн цагт ялалтаар дуусгаж байсан Швейцарын багаас оноо зулгааж байж л дараагийн шатанд шалгарах байсан хүнд даалгавраа Латвийн баг амжилттай гүйцэтгэлээ.

1/8 финалын хосууд

Канад — Финланд

ДАШТ-ий финалд гурав дараалан үлдэж өрсөлдсөн Канад, Финландын  аваргууд плей-оффын эхний шатанд таарлаа. Хэсгийн тоглолтоо хэн хэн нь алдаа мадагтай өнгөрөөсөн ч хоорондын тулаан нь гал гарсан, цус урссан байх нь ойлгомжтой.  

Швейцар — Герман

Хэчнээн хэсгээ толгойлсон ч Швейцар дэлхийн хоккейн лидер биш. Тиймээс тэднийг шууд хагас шигшээд шалгарна гэж таамаглаж болохгүй.

АНУ — Чех

Хэсэгтээ ялагдаагүй цорын ганц баг болох АНУ тогтворгүй тоглолттой, нас ахмад Чехийн багийг буулган авна гэж шинжээчид үзэж байгаа ч энэ ДАШТ сэнсаац түүрэн байгааг санах хэрэгтэй.

Швед — Латви

Шведийн бүрэлдэхүүн илүү хүчирхэг ч нутгийн талбай Латвийн талд байна.