Абдулла Курбанов: Хүнд жинд лидер болох зорилготой

Саяхан Дагестанд болж өнгөрсөн ОХУ-ын аварга шалгаруулах чөлөөт бөхийн тэмцээний 125 кг-ын жинд 21 настай Абдулла Курбанов түрүүллээ. Тэрээр тэмцээний дараа сэтгүүлчдэд ярилцлага өгөхдөө “Дэвжээн дээр өрсөлдөгч хэн ч байсан айж, эмээдэггүй” гэж хэлсэн юм.

-Баяр хүргэе.

-Анх удаагаа насанд хүрэгчдийн УАШТ-д оролцоод түрүүлсэндээ маш их баяртай байна. Би өсвөр, залуучуудын дотоодын бүх тэмцээнд түрүүлсэн. Тийм болохоор насанд хүрэгчдийн тэмцээнд ч түрүүлнэ гэж бэлтгэлээ хийсэн. Энэ ялалтыг намайг үргэлж дэмждэг гэрбүл, багш, дасгалжуулагч нартаа зориулж байна. Миний бүх хийж буй зүйл тэдний төлөө байдаг.

-Насанд хүргэчдэд түрүүлэхэд илүү хэцүү байсан биз дээ?

-Тиймээ, маш хүнд хэцүү тэмцээн байлаа. Гэхдээ тэмцээн болгон л амар биш, бас сонирхолтой байдаг шүү дээ. Танхимд байсан хүмүүс намайг их дэмжсэнд баярласан.

-Хамгийн хүнд жинд ОХУ-д тодорхой лидер байхгүй удлаа. Та энэ жингийн лидер болоход бэлэн үү?

-Үүний төлөө л би өдөр бүр бэлтгэл хийж, хөлсөө асгаруулж байгаа.

-Яагаад бөх болохоор шийдэв?

-Аав минь ах бид хоёрыг бөхийн танхимд анх оруулж байдаа. Таван настайгаасаа барилдаж эхэлсэн. Эхний хоёр жил ахдаа хань болох гэж очдог байсан бол дараа нь бөхийн амтанд орсон.

-Багадаа ямар бөхийг шүтдэг байв?

-Анх секцэнд орж байхдаа бөхчүүдийгогт мэддэггүй, таньдаггүй байсан. Дараа нь бага багаар сонирхож эхэлсэн. Махач Муртазалиевын барилдаан, зан чанар нь их таалагддаг байлаа.

-Та 24 нас хүртлээ залуучуудын тэмцээнд орж болно. Эсвэл цаашдаа насанд хүрэгчдэд л барилдах юм уу?

-Энэ талаар бодож байгаагүй юм байна. Дасгалжуулагч багштайгаа ярьж байгаад шийднэ. Ер нь багшийн хэлснээр л явна даа.

-Мэргэжлийн Поддубный лигт барилдахыг хүсэж байна уу?

-Мэдээж хэрэг. Тэнд Туркийн олимпын аварга алдарт Таха Акгультэй халз барилдах мөрөөдөлтэй. Барилдаж үзэхийг хүсэж байгаа бөх олон байгаа.